Kanë mjaftuar një vit hetime që prokuroria e Fierit të ngrejë akuza për katër persona,si të dyshuar në implikimin e vrasjes së shtetasit, Denis Kasaj dhe plagosjen e Klement Kastratit e Elton Margaritit. Ngjarja ka ndodhur në janar të 2016, ku tre personat e mësipërm kanë rrënë në pritë teksa udhëtonin me automjetin e tyre. Sipas hetimeve të prokurorisë së Fierit, personi që akuzohet për vrasjen e Kasaj dhe plagosjen e dy personave të tjerë dyshohet të jetë shtetasi Ilir Memushaj, i arrestuar në Vlorë vetëm pak ditë pas atentatit mafioz në hyrje të qytetit të Fierit. Ndaj Memushajt është ngritur akuza e vrasjes me paramentim të Denis Kasajt dhe plagosjen e dy personave të tjerë.Kjo akuzë nuk është pranuar nga Memushaj, gjatë fazës së hetimit dhe se ai në asnjë moment nuk ka pranuar të japë sqarime për prokurorinë e Fierit. Oficerët dhe prokurorët e kësaj të fundit kanë tentuar disa herë të marrin në pyetje Memushaj, por në asnjë moment ai nuk ka pranuar të flasë, duke u mjaftuar me fjalët se s’kishte dijeni për ngjarjen.Ndërkohë dy të pandehurit e tjerë të kësaj dosje janë Ermal Binjaku, Ylli Nazëraj të proceduar për akuzën e sigurimit të mjeteve dhe kuhsteve për të kryer një krim.Gjithashtu i pandehur në këtë çështjë është marrë dhe oficeri i SHISH, Florian Bushi, për akuzën e “Shpërdorimit të detyrës’ dhe “Nxjerjes së sekretit hetimor”.Bushi, i dërgonte informacion grupit kundërshtar mbi hetimet që kryente, për grupin Kastratit.
Përdorën makina me qera
Kamera e sigurisë e instaluar në ambientet e brendshme të një agjencie për dhënien e makinave me qera në Tiranë, ka shërbyer për prokurorët e Fierit në identifikimin e njërit prej autorëve të dyshuar në vrasjen e Denis Kasajt dhe plagosjen e Klement Kastratit e Elton Margariti. Vlonjati Memushaj është identifikuar si personi që ka marrë me qera automjetin tip “Toyota” tre ditë para vrasjes, e cila është përdorur në pritën e ngritur në vendin e quajtur “Kthesa e Mullirit të vjetër”. Burimet i thanë gazetës “Shqiptarja.com” se makinës tip “Toyota” që është në pronësi të një agjencie për dhënien e makinave me qera në Tiranë, i janë hequr targat shqiptare dhe i janë vendosur targa të huaja. Hetuesit thonë se personi që ka tërhequr makinën dhe ka plotësuar dokumentacionin pranë agjencisë është i arrestuari Ilir Memushaj. Tashmë të gjitha dokumentet e sekuestruara nga prokuroria dhe pamjet filmike janë administruar në dosje.
Ngatërruan objektiv
Denis Kasaj, i riu që mbeti i vrarë me disa plumba nuk ka qenë objektivi i pritës së ndodhur në hyrje të Fierit. Dyshohet se vrasja e Kasaj ka qenë e gabuar, pasi plumbat e kallashnikovit mendohet se janë nisur për shokun e Kasajt, shtetasin Klement Kastratin. Ky i fundit njihet si person me precedent penale dhe i etiketuar nga policia e Fierit se merret me trafik droge në Holandë dhe Belgjikë. Burimet pranë prokurorisë së Fierit thanë për gazetën se tregtia e drogës e pazaret e prishura kanë qenë dhe motivet kryesore të këtij atentati. Më tej burimet shtuan se Klement Kastrati është proceduar për një plagosje para 6 vitesh, por më pas kjo çështje është pezulluar për shkak të mungesës së provave. Pista e hakmarjes sipas hetuesve ka rënë,kjo pasi edhe pala e dëmtuar në këtë plagosje nuk e ka vijuar më tej konfliktin.
Atentati i 8 janarit, në “Kthesa e Mullirit të Artë”
Ngjarja për të cilën akuzohen Ermal Binjaku, Ilir Memushaj dhe Ylli Nazëraj dhe Florian Bushi, ka ndodhur mbrëmjen e 8 janarit të këtij viti. Denis Kasa, i cili ishte kthyer nga Italia për festat e fundvitit ishte duke udhëtuar me dy shokët e tij me një automjet tip “Benz” për në drejtim të Lushnjës, kur në vendin e quajtur “Kthesa e Mullirit të Artë” janë qëlluar me breshëri automatiku. Sipas bluve, drejtuesi i mjetit (Kasa) ka dalë me shpejtësi nga makina dhe ka tentuar që të largohet, por ka mbetur i vrarë, ndërsa janë plagosur rëndë Kastrati dhe Margariti. Makina me të cilën ata udhëtonin është përfshirë nga flakët, kurse autorët e krimit janë larguar me një automjet tip “Toyota”.
Nga nipi i Kasajt, pas ndalimit u kërcënua në burg
Ilir Memushaj,i cili pas arrestimit nga policia u mbajt në paraburgimin e Fierit, morri në atë kohë mesazhe kërcënuese për jetën. Nga sa u mësua, në paraburgimin e Fierit ndodhej dhe njëri nga nipat e viktimës Denis Kasaj, i cili ka kërcënuar me jetë në atë kohë, Ilir Memushaj, por kjo gjë nuk është deklaruar zyrtarisht nga strukturat e Drejtorisë së Përgjithshme të Burgjeve. Vetë Memushaj në deklarimet e tij para prokurorëve të Fierit nuk ka pranuar autorësinë e vrasjes së Denis Kasaj dhe plagosjen e Klement Kastratit dhe Elton Margaritit. Sipas tij, ai nuk ka njohje fare me viktimat dhe nuk ka pasur konflikte me ta. Memushaj u gjet i implikuar në vrasjen e Fierit pasi një kamera sigurie e instaluar në ambientet e brendshme të një agjencie për dhënien e makinave me qira në Tiranë, ka shërbyer për prokurorët e Fierit në identifikimin e Ilir Memushajt, i cili është arrestuar menjëherë nga policia teksa ishte duket udhëtuar në Vlorë me një automjet tip “Audi”.
