Ambasadori i Greqisë në Brazil, Kyriakos Amiridis, është zhdukur prej tre ditësh, pasi ishte nisur për një udhëtim nga Brasilias drejt Rios, por sot policia braziliane mësohet të ketë gjetur të djegur makinën që kishte marrë me qira ambasadori dhe brenda saj një trup të pajetë. Sipas “The Guardian” ka dyshime të forta që trupi i pajetë të jetë i ambasadorit grek.
Mësohet se 59-vjeçari do të shkonte për të festuar Vitin e Ri në plazhin e Kopakabanas, ndërsa për herë të fundit është parë në periferi të Rios ku u gjet dhe makina.
Ekspertët e policisë kanë nisur hetimet për ngjarjen, ndërsa pritet edhe identifikimi i kufomës së gjetur në makinë.
Ambasadori i kishte telefonuar së shoqes të hënën nga një apartament në Nova Iguacu, duke i thënë se po bëhej gati të dilte e që prej atëherë, prej tij nuk pati më asnjë lajm.
Ambasada e Greqisë në Brazil, por edhe Konsullata greke nuk kanë komentuar rreth vendndodhjes së ambasadorit të tyre. Kyriakos Amoiridis ishte ambasador në Rio nga viti 2001 deri në vitin 2004, ndërsa në janar të këtij viti, ai u bë ambasador grek në Brazil.
BW/d.i.
