Agron Neza, biznesmeni shqiptaro-amerikan, që dyshohet të ketë bashkëpunuar me ish-agjentin e FBI-së të vënë në hetim në SHBA, ka qenë student i shkollës së Sigurimit në fund të viteve ’80. Sipas gazetarit Mero Baze, në vitin 1990 Agron Neza, që tani jeton në Nju Xhersi, u bë badigard vullnetar i Azem Hajdarit dhe Sali Berishës.
“Duke parë rreziqet që shoqëronin Azemin, sidomos pas vrasjes në tragetin e Tropojës të dikujt me pardesynë e tij, ai i dha Azemit pistoletën e punës ta kishte për siguri. Berisha nuk e harroi këtë detaj. Sapo erdhi në pushtet më 1992 dhe filloi sherret me Azemin, urdhëroi prokurorinë të gjente pistoletën e Azemit dhe e shpalli Agronin në kërkim, se nuk kishte dorëzuar pistoletën.Kështu, nga njeri që i kishte shpëtuar kokën më 1991, e detyroi të arratisej në SHBA dhe mezi e mbylli çështjen e mosdorëzimit të armës pas dhjet vitesh”, shkruan gazetari Mero Baze, që thotë se e ka njohur personalisht Agron Nezën.
Në një dalje për mediat këtë të mërkurë ish-kryeministri Sali Berisha tha se nuk e njeh Agron Nezën.
“Unë nuk e njoh personalisht atë. Nuk kam asnjë lidhje. Ai ka punuar në shërbim në qytete të ndryshme. Ka shumë gjëra që faktojnë të kundërtën e asaj që akuzojnë këta”, tha Berisha.
Por gazetari Mero Baze, këmbëngul në njohjen mes 2 tropojanëve. “Ja përmend emrin sikur nuk e njeh, edhe pse e ka pritur në zyrë disa herë më pas, duke i kërkuar ndjesë për atë që i ka bërë”, shkruan Baze.
Zyrtari i lartë i FBI Charles McGonigal po hetohet në SHBA për thyerje të sanksioneve, duke ndihmuar një oligark rus. Zyrtari ka pasur një udhëtim në Tiranë dhe më 9 shtator 2017 edhe një takim me kryeministrin Edi Rama, që kreu i qeverisë e konfirmon, por që thekson se nuk ka lidhje me pjesën tjetër të jetës dhe punës së ish-agjentit të FBI. Sipas aktakuzës, zyrtari i FBI u ka thënë prokurorëve se ka lobuar që Edi Rama të mos i japë licencë për zbulim nafte një kompanie guaskë që ka fije lidhëse me Rusinë. Lobimi në një kohë kur agjenti ka qenë ende në punë, konsiderohet konflikt interesi.
Emri i Agron Nezës nuk përmendet zyrtarisht në aktakuzën ndaj McGonigal, por dyshohet janë se është pikërisht ai, personi që i ka dhënë në dorë 225 mijë dollar ish-agjentit të FBI, (i cili nuk i ka deklaruara) për influencë tek autoritetet shqiptare me përfitime në biznes.
Në akuzën zyrtare të prokurorisë së Uashingtonit në Shtetet e Bashkuara, personi të cilin e përshkruan vetëm me germën A, dhe me dyshimet e arsyeshme se është Agron Neza, mes të tjerash i ka kerkuar ish-zyrtarit të lartë i FBI të hapë një hetim në SHBA për një shtetas amerikan që ka lobuar “për një parti politike shqiptare, e ndryshme nga ajo në të cilën është anëtar kryeministri
Ky episod u përdor nga sekretari i Përgjithshëm i PD, Gazmend Bardhi, për të dorëzuar një padi në SPAK për hetimin e Edi Ramës, pasi rasti i përmendur në aktakuzën e prokurorisë amerikane, mund të jetë për paratë e lobit rus të Lulzim Bashës.
Në Tiranë, në 2019-ën, ish-agjenti i FBI sipas dokumenteve zyrtare të QKB, u bë bashkëaksioner me Agron Nezën në një studio ligjore, të hapur që prej vitit 2008, nga Shefqet Dizdarin, një avokat nga Tropoja, pronar i një kompanie shfrytëzimi nafte, licencuar nga Berisha në kohën e fundit kur ishte në pushtet.
/s.f
Nuk ka qene student ne fund te viteve ’80, por e ka filluar shkollen ne vitin ’82 e mbaruar ne vitin ’85. Dhe gjate kohes se shkolles, Agroni ka qene nje djale vertete i mire. Me vone nuk e di.