Edhe deputetë të maxhorancës kanë reaguar për dorëheqjen e detyruar të Drejtorit të Përgjithshëm të Teatrit Kombëtar të Operës dhe Baletit, Ilir Kerni. Bëhet fjalë për deputetët e Partisë Socialiste, ish-botuesin Fatmir Toçi, gjuhëtaren Ledi Shamku Shkreli dhe ish-gazetarin Erion Braçe. Përmes postimesh në rrjetet sociale, ata jo vetëm kanë shprehur keqardhjen për dorëheqjen e Kernit, por kanë kërkuar edhe rikthimin e tij të shpejtë në atë detyrë.
“Ilir Kerni jep dorëheqjen! Nuk mund ta besoj…Keqardhje për një artist të pashoq si Ilir Kerni që i riktheu besimin dhe spektatorin Teatrit të Operas dhe Baletit, por më shumë më vjen keq për TOB-in dhe adhuruesit e muzikës dhe artit të vërtetë”, shkruan deputeti Toçi.
Si kryetar i Komisionit të Ekonomisë, deputeti Erion Braçe shprehet, se do të bëjë çmos për rritjen e buxhetit të TOB, arsyeja kryesore kjo, pse Kerni u detyrua të largohet nga detyra. “Lexova mbi këtë rrëmujë në Opera. As që dua ta zgjas, nëse do të më dëgjohej fjala për këtë, do t’i lutesha kujtdo që të rikthente në detyrë Ilir Kernin. Si sot me shfaqje Operan, nuk e kam parë ndonjëherë. Për veten do të bëj çmos për buxhetin e ri të saj”, i lutet Braçe kryeministrit Rama për rikthim të Kernit. Pavarësisht se nuk ja zë emrin në gojë, dihet se ashtu si e emëroi 3 vite më parë dhe e detyroi të largohet tani, është po Rama që ka në dorë edhe rikthimin e tij.
Edhe deputetja Ledi Shamku pasi ka shprehur pikëllimin për këtë ngjarje, ka shkruar në statusin e saj një sërë vlerësimesh të larta për Kernin si artist.
