Nike dhe kompani të tjera kanë pezulluar marrëveshjet e sponsorizimit me Maria Sharapovën, pasi tenistja ruse pranoi se ka dalë pozitive në një test dopingu në Australian Open.
Sharapova, e cila për shumë kohë ka qenë sportistja më e paguar në botë, tha të hënën se ka marrë meldonium që më 2006 dhe nuk e kishte mësuar se ajo ishte shpallur substancë e ndaluar nga Agjencia Botërore e Anti-Dopingut (WADA) në fillim të vitit 2016.
“Jemi të befasuar e të trishtuar nga lajmi për Maria Sharapovën”, bëri të ditur Nike në një deklaratë. “Kemi vendosur të pezullojmë marrëdhënien me Marian gjatë kohës së hetimit”.
Prodhuesi i makinave Porsche, në pronësi të Volkswagen, bëri të ditur shtyrjen e të gjitha aktiviteteve të sponsorizimit me Sharapovën.
Kompania zvicerane e orëve, TAG Heuer, njoftoi pezullimin e bisedimeve me tenisten për rinovimin e kontratës së sponsorizimit, e cila kishte skaduar në dhjetor.
Sharapova ka lidhje shumë të thella me Nike, e cila ka një koleksion të tërë veshjesh tenisi me emrin e ruses. Kontrata aktuale 8-vjeçare me kompaninë thuhet se ka vlerë 70 milionë dollarë.
Në një intervistë me CNN në gusht, Sharapova tha se ka qenë në partneritet me Nike që në moshën 11-vjeçare.
