Numri i punonjësve dhe praktikantëve me kontratë të përkohshme për vitin 2018 në njësitë e qeverisjes qendrore është shtuar me 200 punonjës. Qeveria ka ndryshuar vendimin e datës 31 janar 2018, ku ishte vendosur që numri i punonjësve dhe praktikantëve me kontratë të përkohshme në institucionet shtetërore të ishte 1 752.
Vendim ky që është ndryshuar nga Këshilli i Ministrave, duke e rritur numrin e punonjësve në administratë me rreth 200 të tillë. Kështu, deri në fund të vitit 2018 numri i punonjësve të përkohshëm në administratë do të jetë 1989 punonjës.
Numrin më të lartë të punonjësve me kontratë të përkohshme e ka Ministria e Drejtësisë, e cila ka punësuar edhe 150 persona nga 487 që ishin miratuar në janar 2018. Këta persona do të punësohen të gjithë pranë ALUIZN-it, ku 140 do të jenë në rolin e specialistit dhe 10 të tjerë si teknikë të mesëm.
Kontrata e tyre do të jetë 6-mujore. Punonjës do të shtohen edhe në Ministrinë e Financave dhe Ekonomisë, të Energjisë, të Arsimit si dhe në institucionet e tjera qeveritare, duke përfshirë edhe shërbimin informativ. Aktualisht numrin më të madh të punonjësve me kontratë të përkohshme e ka Ministria e Financave dhe Ekonomisë, ku rreth 300 punonjës janë të punësuar te Tatimet.
Dosjet
Sipas ligjit në fuqi, çdo institucion shtetëror, institucion i pavarur dhe njësi e qeverisjes vendore krijon dhe administron dosjen e personelit të çdo të punësuari të institucionit (dosja individuale). Dosja individuale përmban të dhënat profesionale për çdo të punësuar dhe nëpunës civil, si dhe çdo të dhënë tjetër, lidhur me marrëdhëniet e punës.
Departamenti i Administratës Publike krijon dhe administron Regjistrin Qendror të Personelit, që është një bazë unike shtetërore të dhënash, që përfshin të dhënat profesionale dhe të dhënat e tjera për marrëdhëniet e punës të çdo të punësuari në institucionet e administratës shtetërore, institucionet e pavarura dhe njësitë e qeverisjes vendore. Çdo institucion i administratës shtetërore, institucion i pavarur dhe njësi e qeverisjes vendore është i detyruar të japë të dhënat e përcaktuara në ligj.
Këshilli i Ministrave përcakton rregulla të hollësishme për përmbajtjen, procedurën dhe administrimin e dosjeve të personelit dhe Regjistrit Qendror të Personelit, të dhënat që mbahen në to, si dhe mënyrën e mbajtjes, të hedhjes, të përditësimit dhe të përdorimit të të dhënave.
