Presidenti amerikan Donald Trump ka deklaruar këtë të mërkurë, më 6 gusht, se i dërguari i posaçëm i SHBA-ve, Steve Witkoff, bëri “përparim të madh” gjatë takimit të tij me presidentin rus Vladimir Putin, dhe se ai ka informuar disa nga aleatët evropianë të Uashingtonit pas takimit.
“I dërguari im i posaçëm, Steve Witkoff, sapo pati një takim jashtëzakonisht produktiv me Presidentin rus Vladimir Putin. U bë një përparim i madh! Më pas informova disa nga aleatët tanë evropianë. Të gjithë janë dakord se kjo luftë duhet të përfundojë dhe ne do të punojmë drejt këtij qëllimi në ditët dhe javët në vijim,” shkroi Trump në një postim në Truth Social, citon Reuters.
Witkoff mbërriti në Moskë rreth orës 07:00 sipas kohës lokale, ku u prit në aeroportin Vnukovo nga Dmitriev. Rreth një orë më pas, të dy bënë një shëtitje në Parkun Zaryadye në qendër të Moskës.
Në takim ishte gjithashtu i pranishëm asistenti presidencial rus, Yuri Ushakov, dhe Kirill Dmitriev, kreu i Fondit të Investimeve të Drejtpërdrejta të Rusisë dhe i Dërguari i Posaçëm Presidencial për Bashkëpunim Ekonomik me vendet e huaja. Kremlini gjithashtu e konsideroi këtë një takim shumë produktiv.
Ky takim vjen ndërsa po afron afati i përcaktuar nga presidenti amerikan Donald Trump për Rusinë që të pranojë një armëpushim në Ukrainë.
Presidenti amerikan kishte paralajmëruar se Rusia mund të përballet me sanksione të rënda, ose me sanksione dytësore ndaj të gjithë atyre që tregtojnë me të, nëse nuk ndërmerr hapa për të ndalur “luftën e tmerrshme” në Ukrainë.
