Avokati Romeo Kara thotë se duhet të ishte bërë hetim më i plotë për dosjen “CEZ DIA”, ku i akuzuar është edhe ish presidenti Ilir Meta, i cili pas përfundimit të hetimeve për tre çështjet ndaj tij, ka kërkuar lirinë nga burgu.
Në një intervistë për “Tirana Liva” në ABC News, Kara u shpreh se lidhur me këtë kërkesë të Metës, gjykata do vlerësojë nëse ai mund të prishë provat.
Për “CEZ DIA”, Kara shtoi se Meta mori bekimin e ish kryeministrit Sali Berisha.
“Mendoj që mbas komunikimit të akuzës dhe sidomos hetimit që hetimet janë mbyllur, pritej të bëhej ky hap. Kanë ofruar qëndrimin e tij, duke marrë masë bllokimin e pasaportës. Ka rëndësi që procesi të vazhdojë dhe drejtësia të thotë fjalën e saj. Unë jam njohës i mirë, aty ka 3 akuza, CEZ DIA, lobimi dhe për mosdeklarimin e pasurisë. Për CEZ DIA duhet të kishim hetim më të plotë. Vendimi i ERE duhet të ishte hetuar, pretendohet se ka qenë vendim i ndikuar. Këtu kemi një hetim të ngushtuar, duhet të kishim më shumë palë të hetuar, por edhe para organeve të drejtësisë. Vendime të tilla të ERE me këtë faturë, nuk kalonin pa e ditur Ministria e Financave dhe kryeministri. Ai vendim i ERE nuk është marrë pa dakordësinë e Berishës. Ky është korrupsion me dy palë, po pala çeke ku është? Unë nuk mund ta besoj se do kalojë kaq thjesht , me një person. Ky s’e ka bërë vetë këtë. Ata kanë bërë korrupsion në dëm të shtetit shqiptar.”, theksoi ai.
