Presidenti Donald Trump, ka shtuar retorikën ndaj Papa Leonit XIV, duke e akuzuar se “po rrezikon shumë katolikë” për shkak të qëndrimit të tij ndaj Iranit dhe armëve bërthamore.
Deklaratat e Trump vijnë vetëm dy ditë para një takimi të rëndësishëm në Vatikan mes sekretarit amerikan të shtetit, Marco Rubio, dhe Papës, një përpjekje për të ulur tensionet mes Uashingtonit dhe Selisë së Shenjtë.
Në një intervistë për moderatorin konservator Hugh Hewitt, Trump u shpreh se Papa “duket sikur mendon se është në rregull që Irani të ketë armë bërthamore”, duke shtuar se kjo është “e rrezikshme për shumë njerëz”.
Megjithatë, Papa Leoni XIV nuk ka deklaruar kurrë se mbështet pajisjen e Iranit me armë bërthamore. Ai ka kundërshtuar vazhdimisht luftën dhe përshkallëzimin e konfliktit në Lindjen e Mesme, duke bërë thirrje për armëpushim dhe dialog diplomatik.
Ambasadori amerikan në Vatikan, Brian Burch, deklaroi se pret një takim “të hapur dhe të sinqertë” mes Rubios dhe Papës në Pallatin Apostolik. Sipas tij, qëllimi është përmirësimi i mirëkuptimit mes dy palëve, pavarësisht dallimeve.
“Mosmarrëveshjet janë pjesë e marrëdhënieve ndërkombëtare, por zgjidhja vjen përmes dialogut të sinqertë”, tha Burch.
Përplasjet mes Trump dhe Papës nisën në prill, kur presidenti amerikan e quajti atë “të dobët” dhe kritikoi performancën e tij si udhëheqës i Kishës Katolike. Në të njëjtën periudhë, Trump publikoi edhe një imazh të krijuar me inteligjencë artificiale ku paraqitej si Krishti, të cilin më pas e fshiu.
Vizita e Rubios në Vatikan përkon me përvjetorin e parë të papnisë së Leos dhe pritet të pasohet nga takime në Itali, përfshirë kryeministren Giorgia Meloni dhe ministrin e jashtëm Antonio Tajani.
Ndërkohë, edhe zëvendëspresidenti amerikan, JD Vance, ka kritikuar Papën, duke sugjeruar që Vatikani duhet të fokusohet më shumë në çështje morale dhe të tregojë kujdes në deklaratat për luftën dhe teologjinë.
Rubio dhe Vance kishin marrë pjesë në inaugurimin e Papës vitin e kaluar dhe i kishin dorëzuar një ftesë nga Trump për vizitë në Shtëpinë e Bardhë, një ftesë që ende nuk është pranuar.
