Lu zgjedh elementë të diasporës dhe i fton: Kthehuni të bëjmë drejtësi në Shqipëri

Ambasadori amerikan në Tiranë Donald Du ka qënë shumë konkret këto ditë. Ai ka shfrytëzuar më së miri Samitin e Diasporës në Tiranë për të zhvilluar një takim në ambasadë me ata që ai mendon se mund të marrin në dorë fatet e drejtësisë në Shqipëri. Duke qënë se përzgjedhja e njerëzve që do të pastrojnë drejtësinë dhe më pas politikën përmes drejtësisë, do të jetë nën një monitorim të fortë të SHBA dhe BE, ambasadori Lu nuk e ka lënë shansin t’i shpëtojë përderisa i ka pasur të gjithë njerëzit e duhur në Tiranë.

Burime brenda takimit të Lu me përfaqësuesit e Diasporës nënvizojnë se ambasadori amerikan u ka kërkuar atyre të involvohen në drejtësinë shqiptare, për shkak se procesi i Vettingut që do të nisë, sado vonë të shkojë, do të “skartojë” gati 90 përqind të gjyqtarëve dhe prokurorëve. Njëherësh vendi ka nevojë jo vetëm për prokurorë dhe gjyqtarë të rinj, por dhe të certifikuar në SHBA por dhe në BE për të marrë në dorë luftën kundër krimit dhe korrupsionit.

Një ndër përfaqësuesit e denjë të plejadës së gjyqtarëve që ka lënë shenjë në Shqipëri, ish-kreu i Gjykatës së Kasacionit Zef Brozi, tashmë një shqiptaro-amerikan, e ka publikuar foton me ambasadorin Donald Lu edhe në profilin privat, duke nënvizuar fort vullnetin e diplomatit të SHBA-së për të punuar me shqiptaro-amerikanët. “Një kujtim i bukur me ambasadorin e nderuar Donald Lu gjatë pritjes që ambasada Amerikane në Tiranë dha më 17 Nentor 2016 për diasporën shqiptare të Amerikës”, shkruan në profilin e tij në rrjetin social Facebook ish-kryetari i Kasacionit, sot Gjykata e Lartë, Zef Brozi. Ai është njeriu që i vetëm përballoi Berishën në kulmin e fuqisë së tij në vitet 1994-1995 në një përplasje të drejtëpërdrejtë me të për pavarësinë e gjyqësorit, derisa Presidenti i asaj kohe e shkarkoi. Dhe për më tepër e përndoqi me policinë sekrete dhe shërbimin sekret të Gazidedes derisa u largua me ndihmën e amerikanëve në SHBA. Pikërisht Brozi ka lënë për të kuptuar se përfaqësuesit e diasporës ka qënë të gatshëm për të kontribuar aty ku është dhe fronti më i vështirë: drejtësia shqiptare, pastrimi i saj dhe lufta kundër krimit, korrupsionit dhe dhënies fund të pandëshkueshmërisë së zyrtarëve të lartë.

Me sa duket, si “mijtë” që parandjejnë tërmetin, këtë ka parandjerë dhe ish-kryeministri Sali Berisha, i cili bëri çfarë mundi për të njollosur ish-kreun e Kasacionit Zef Brozi, duke tentuar ta përlyejë me hashashin e Mirditës. Ndoshta ka qënë një hakmarrje e vogël dalja e Zef Brozit në foto me ambasadorin Donald Lu dhe publikimi i saj në rrjetet sociale, kuptohet me mnirëkuptimin e Lu.

Mësohet se takimi ka qenë i zgjeruar, dhe se pjesa më e madhe e pjesëmarrësve kanë qënë nga radhët e jurisprudencës, kryesisht dhe të rinj të gatshëm për të kontribuuar. Mësohet se mes tyre kanë qënë dhe kontigjenti i parë i trajnuar në SHBA për të kontribuar gjatë implementimit të reformës në drejtësi dhe më pas deri në pastrimin e drejtësisë nga të korruptuarit.

Ambasadori amerikan Donald Lu nuk lë rast pa promovuar përfaqësuesit e diasporës që vijnë për të kontribuar në Shqipëri, dhe në veçanti në sistemin e drejtësisë. Të njejtën gjë bëri gjatë festës së Amerikës, ku Gjon Juncaj u vesh me qeleshe dhe tirqe dhe foli për spastrimin e politikës dhe të drejtësisë nga të korruptuarit. Ku veshja dhe fjalimi i Juncajt bëri që kreu i LSI dhe i Kuvendit Ilir Meta të largohej në mënyrë demonstrative nga takimi, i zemëruar me Lu.

Por ambasadori i SHBA e ka marrë si ndihmës për reformën në drejtësi Gjon Juncajn, një shqiptaro-amerikan me origjinë nga Veriu i Shqipërisë, që në SHBA është bërë i famshëm për futjen e mafiozëve në burg.

SHBA përmes ambasadorit të saj në Tiranë, në bashkëpunim me BE tashmë e kanë ndarë mendjen që Prokurorinë Speciale dhe Byronë Kombëtare të Hetimit ta “popullojnë” me shqiptaro-amerikanët dhe diaspora shqiptare, të shkolluar dhe trajnuar në Perëndim. Njerëz të cilët nuk kanë asnjë varësi, qoftë ekonomike apo edhe njerëzore, nga “koorporata” 25-vjeçare e drejtësisë në Shqipëri që vetëm drejtësi nuk kanë bërë në asnjë rast.
Pamfleti.com/d.i.