Nga Elvi Fundo
Ka disa arsye, shumë të forta të cilat shkojnë deri tek ekzistenca e opozitës, që shpesh herë më detyrojnë në një formë apo tjetër, t’i drejtoj një letër publike doktor Berishës, me gjithë bindjen time se ai i vlerëson, i lexon dhe jo rrallë vepron kur mendimet janë të lira, edhe pse mund të jenë kontradiktore me qëndrime apo bindje të tij.
Këtë herë, kërkesa që shprehet që në titull, më shumë se hipërbolë, kërkohet si një akti i vërtetë për të shpëtuar PD-në, por ndoshta edhe vetë Lulin.
Për këtë po sjell disa argumenta:
Një vit e gjysëm më parë në kohën e çadrës, kur Rama largoi Saimir Tahirin dhe emëroi Fatmir Xhafën, Lulzim Basha tha “Fatmir Xhafaj do hynte në zyrë, kur të kalonte mbi trupin e tij, apo trupat tanë”. Më pas Xhafaj hyri në zyrë dhe kaloi lehtësisht mbi trupin e Lulit. Pasojat ende nuk janë bërë publike.
Pak muaj më parë, nga foltorja e PD-së, Enkelejd Alibeaj filloi një denoncim serioz ndaj ministrit Xhafaj, në lidhje me vëllain e tij dhe lidhjet që Agron Xhafaj kishte pasur me krimin apo edhe dënimin për aktivitetin e tij kriminal në Itali.
Më pas doli historia e “Babales”, e servirur nga ndonjë mendjelli, duke e degjeneruar kauzën, e filluar nga deputeti Alibeaj. Pasi mendjellinjtë e tij ja servirën, Luli e besoi dhe pa harruar herën e parë, ndoshta dhe nga malli, tha se Xhafaj duhej të kalonte mbi trupin e tij për të qënë më tej ministër, apo për të shkuar në zyrë.
Dy herë e tha e dy herë Xhafaj kaloi mbi trupin e Lulit. Pasojat ende nuk dihen. Se Luli ka dhe një huq këto sekrete nuk i tregon.
Një vit më parë, me 17 maj, ditën e festës së LGBT, me një marrëveshje, Edi Rama kaloi mbi trupin e Lulit. Luli humbi zgjedhjet turpshëm dhe mbi trupin e tij kaluan edhe të paktën 230 mijë demokratë, pa folur për 1 milion shqiptarë.
Nga atëherë e deri më sot Luli, na tha se do kishim një skandal të madh në lidhje me ministrin e Jashtëm, Ditmir Bushati, që do e rrëzonte nga ministër, por ende nuk e kemi parë as dëgjuar, Bushati vazhdon detyrën dhe ka diçka që nuk shkon, ose edhe ky ka kaluar mbi trupin e Lulit .
Luli dhe të tijët na thanë për një megaskandal të Damian Gjiknurit, por ende nuk e dëgjuam. E mbylli me lekë, apo pa lekë mbi trupin e Lulit, Gjiknuri shkon i qetë në zyrë. Vazhdon detyrën. Akuza ka pasur edhe për ministrin e Financave, Arben Ahmetaj, por ky kaloi më shpejt nga të gjithë mbi trupin e Lulit.
Pa folur për heshtjen shumë kohë të Lulzim Bashës për tendera, skandale dhe afera për Erion Veliajn. Thjeshtë duke bërë show me ndonjë konferencë. Edhe ky mbi trupin e Lulit, Doktor? Këtë nuk e beson dot askush.
Nuk mund të lë pa përmendur sjelljen me Ilir Metën dhe LSI-në. Iliri ishte i pari që kaloi mbi trupin e Lulit gjatë kohës së çadrës, dhe tani duket se i ka lënë Petrit Vasilin.
Kush nuk i ka kaluar mbi trup Lulit, Doktor, vetem Niko Peleshi si djalë namusqar pe Korce ka mbeturr.
Prandaj do të lutesha shumë që ti kaloje edhe ti një herë, nuk bëhet qameti. Sa i kalojnë nga këta më sipër, sidomos këta të qeverisë na turpëroi fare.
Ata i kalojnë mbi trup dhe Luli nuk lëviz nga vendi, rri gjithë qejf në krye të PD-së dhe pret t’i kalojë i rradhës.
Ndoshta po ti kalosh ti, ikën një herë e mirë, shpëton PD-ja dhe kemi opozitë.
Miqësisht mendoje Doktor, asnjëherë nuk është vonë!
