Kosova vazhdon makthin. Ajo është duke luajtur rolin e spektatorit. Opozita nuk e pranon procesin e dialogut përfundimtar me Serbinë, në të cilin Kosovën e përfaqëson presidenti Hashim Thaçi edhe pse, për këtë, nuk e ka marrë mandatin në Kuvend.
Ajo nuk do të ndërrojë rol, ndonëse dinamika e dialogut do të intensifikohet që në fillim të shtatorit.Qasjen nuk e kanë ndërruar as pasi presidenti Thaçi i është bashkuar idesë së homologut të tij serb, Aleksandër Vuçiq, për t’i ridefinuar kufijtë ndërmjet Kosovës dhe Serbisë, shkruan “Koha Ditore”.
Pas kësaj, iniciativën për një seancë të jashtëzakonshme e ndërmori Grupi parlamentar i Partisë Socialdemokrate (PSD), subjekt ky që muaj më parë u bë pjesë e Kuvendit pas aderimit në të të 12 deputetëve të Lëvizjes Vetëvendosje (LVV).Mirëpo, ajo nuk ka arritur të sigurojë nënshkrimet e nevojshme.
Madje, deri tash nuk ka siguruar mbështetje as nga ndonjë deputet i dy partive të tjera më të mëdha në opozitë – Lidhjes Demokratike (LDK) dhe të LVV-së.Në PSD, të premten, nuk kanë dhënë informacione në lidhje me ecurinë e iniciativës, pergatiti Koha. (b.an)
