Kryetari i Kuvendit, Gramoz Ruçi, mori pjesë në Sesionin e 140 të Unionit Ndërparlamentar në Doha dhe u takua me Emirin e Katarit
Gjatë ditës së dytë të qëndrimit në Katar, Kryetari i Kuvendit, Gramoz Ruçi dhe delegacioni parlamentar shqiptar morën pjesë në Sesionin e njëqind e dyzetë të Unionit Ndërparlamentar, i cili zhvillon punimet në kryeqytetin e Katarit, Doha. Sesioni mblodhi së bashku anëtarë nga më shumë se 170 parlamente të botës, nën moton: “Për Demokracinë, për këdo”.
Para fillimit të Sesionit, Kryetari i Kuvendit, Gramoz Ruçi dhe kryeparlamentarët pjesëmarrës, zhvilluan një takim me Lartmadhërinë e tij Sheik Tamim Bin Hamad Al Thani, Emir i Shtetit të Katarit.
Sesioni i 140 i IPU-së ka në axhendë përpjekjet e parlamentarëve për garantimin e paqen dhe respektimin e të drejtave të njeriut, rolin e tregtisë së drejtë e të lirë dhe të investimeve në arritjen e Qëllimeve të Zhvillimit të Qëndrueshëm, barazisë ekonomike, infrastrukturës së qëndrueshme, industrializimit dhe inovacionit.
Kryetari i Kuvendit, Gramoz Ruci mori pjesë në Debatin e Përgjithshëm mbi temën “Parlamentet si platformë për të rritur edukimin për paqen, sigurinë dhe sundimin e ligjit”.
Gjatë pjesëmarrjes në Asamblenë e Unionit Ndërparlamentar në Doha, delegacioni shqiptar zhvilloi takime me delegacione të parlamenteve të vendeve të ndryshme. Tema e bisedave ishte në tërësi bashkëpunimi ndërparlamentar, ndërsa në veçanti me deputetë të vendeve anëtare të BE-së, si Gjermania, Italia, Rumania, Greqia etj.,u shkëmbyem mendime dhe u ndanë informacione mbi hapat e hedhura nga Shqipëria në procesin e integrimit Europian.
Unioni Ndërparlamentar është organizata ndërkombëtare më e madhe parlamenteve, e krijuar në vitin 1889. Si qendra e dialogut parlamentar në shkallë globale, Unioni punon për paqen dhe bashkëpunimin midis popujve dhe forcimin e demokracisë përfaqësuese, në bashkëpunim të ngushtë me OKB-në, me të cilën organizata ndan të njëjtat objektiva.
