Drejtoria e Përgjithshme e Doganave, lidhur me ngjarjen sot në Shkodër, deklaron se veprimet e kryera nga inspktorët e saj në terren, janë tërësisht në përputhje me ligjin, me qëllim zbulimin dhe ndalimin e veprimtarive të kundraligjshme. Sipas saj, inspektorët e doganave në bashkëpunim me strukturat përkatëse të Drejtorisë Vendore të Policisë Shkodër kanë kryer një aksion të përbashkët, lidhur me ndalimin e fenomenit të prodhimit dhe tregtimit të paligjshëm të duhanit të grirë, produkt për të cilin paguhet akcizë. “Sipas informacioneve të Drejtorisë së Përgjithshme të Doganave, kjo veprimtari e paligjshme vazhdon dhe me kontrabandën e duhanit përtej kufijve, sikundër rezultoi edhe përgjatë operacionit të përbashkët të zhvilluar me homologët malazez, përgjatë muajit Tetor 2016”, thuhet në deklaratën e Dr. së Përgjithshme të Doganave.
Kjo e fundit informon se aksioni u krye ne orët e para të mëngjesit në lagjen Rus në Shkodër dhe gjatë tij u bllokua një sasi duhani e grirë. “Kontrolli vijoi për evidentimin e një magazine në të cilën dyshohet se përpunohet duhani, por gjatë kryerjes së detyrës, punonjësit e Antikontrabandës të Drejtorisë së Përgjithshme të Doganave dhe të Policisë, u ndeshën me reagimin e dhunshëm të tregtarëve të duhanit. Drejtoria e Përgjithshme të Doganave i bën thirrje të gjithë instancave shtetërore, përfshirë dhe pushtetin lokal, për të kryer detyrën e tyre në përputhje me përcaktimet ligjore dhe për të mos lejuar tregtimin e mallrave të akcizës në vende të pamiratuara dhe kontrolluara nga strukturat shtetërore, si dhe ndërgjegjësim të të gjithë qytetarëve dhe subjekteve për të paguar detyrimet përkatëse sikundërse e parasheh ligji”, përfundon deklarata e Doganave.
Ligji 61/2012“Për Akcizat” / Neni 94
Mbajtja, transportimi ose shitja e mallrave të akcizës pa pullë fiskale
- Mbajtja, transportimi ose shitja në çdo lloj mënyre e mallrave, për të cilat kërkohet pajisja me pulla fiskale, pa qenë i pajisur me pullë fiskale, përveç ndjekjes penale, sanksionohet si më poshtë:
a) Gjobë, për herën e parë të konstatuar, sa 2-fishi i detyrimeve fiskale që duheshin
paguar, për herën e dytë të konstatuar, sa 3-fishi i detyrimeve fiskale që duheshin paguar, dhe për herën e tretë të konstatuar dhe më pas, sa 5-fishi i detyrimeve fiskale që duheshin paguar.
- b) Konfiskim të mallrave të gjetura pa pullë akcize/fiskale.
Ligji “Për Procedurat Tatimore”/ Strukturat tatimore të pushtetit lokal/qendror
Neni 41
Identifikimi i personave, që ushtrojnë veprimtari tregtare pa u regjistruar
- Kur administrata tatimore identifikon persona, të cilët ushtrojnë veprimtari ekonomiko-tregtare pa u regjistruar në Qendrën Kombëtare të Regjistrimit, atyre u mbyllet veprimtaria dhe u konfiskohen të gjitha materialet, sipas nenit 121 të këtij ligji.
ma.me