Rusia po thellon bashkëpunimin ushtarak me Korenë e Veriut. Sipas inteligjencës ushtarake ukrainase, një njësi raketore koreano-veriore pritet të dislokohet në rajonin rus të Voronezhit, pranë kufirit me Ukrainën, dhe mund të pajiset me deri në 120 raketa balistike dhe gjashtë lëshues raketash.
Për të mundësuar operimin e këtyre sisteme balisitke do të jenë rreth 90 efektivë ushtarakë nga Koreja e Veriut, të cilët pritet të veprojnë në bashkëpunim me brigadën e 112-të raketore të ushtrisë ruse.
Sipas Kievit, Pheniani ka dërguar tashmë një tjetër kontingjent raketash të tipit KN-23 dhe KN-24, ndërsa detajet përfundimtare të këtij dislokimi pritet të përcaktohen gjatë bisedimeve të nivelit të lartë muajin e ardhshëm.
Megjithatë, Reuters thekson se nuk ka mundur t’i verifikojë në mënyrë të pavarur këto pretendime.
Ekspertët paralajmërojnë se shtimi i raketave balistike përbën një kërcënim serioz për Ukrainën, e cila vazhdon të përballet me mungesë të sistemeve moderne të mbrojtjes ajrore.
Ndërkohë, gjatë natës, Rusia ndërrmori një tjetër sulm të rëndë ndaj Kievit.
Sipas autoriteteve ukrainase, sulmet shkaktuan të paktën 14 viktima, 27 të plagosur dhe dëme të konsiderueshme në depo, ndërtesa dhe zona industriale.
Forcat ajrore ukrainase raportuan se Rusia përdori raketa balistike Zircon dhe Iskander-M, si edhe mbi njëqind dronë, ndërsa mbrojtja ajrore arriti të neutralizojë vetëm dronët, jo raketat balistike.
Përballë këtij presioni në rritje, Ukraina vazhdon tu kërkojë Shteteve të Bashkuara sisteme shtesë Patriot dhe raketa interceptuese PAC-3, të cilat konsiderohen ndër mjetet e pakta të afta për të ndalur raketat balistike ruse.
