Kryeministri Edi Rama gjatë komunikimit “Sy m’Sy” në rrjetet sociale ka replikuar me ndjekësit. Rama theksoi se dalja e tij në komunikim të drejtëpërdrejtë në rrjetet sociale nuk është punë qejfi, por punë, përmes së cilës bën dhe një bilanc të punëve të kryera.
Kryeministri ndër të tjera ka ironizuar edhe koalicionin e formuar nga Partia Demokratike me partitë e tjera, mes të cilave dhe Partinë e Lirisë dhe 24 parti të tjera.
“Puna ime nuk është punë krah, por punë mendje dhe një nga punët e mia është që të dëgjoj dhe të reagoj dhe kjo për mua është punë nuk është qef. Unë nuk jam Tiktokist. Unë jam një përfaqësues i zgjedhur edhe i atyre që nuk më kanë zgjedhur dhe ju detyrohem siç po bëj në rastin konkret edhe me ty i dashur Astrit edhe pse je shumë i helmuar gabimisht sepse në fund të ditës nuk mund të jetë çdo gjë zi edhe sikur të ketë shumë arsye për të qenë të pakënaqur, por në fund fare unë kam detyrimin të komunikoj edhe më ty dhe të shpjegoj gjërat sipas këndvështrimit tim dhe në njëfarë mënyre të jap hesap. Kjo është arsyeja pse unë dal live dhe natyrisht patjetër që duke u afruar dita e zgjedhjeve kam vendosur të intensifikoj daljet dhe komunikimin sepse procesi deri në zgjedhje është edhe një proces bilancesh për të bërë komentet e duhura dhe për të përcaktuar nëse ka apo s’ka arsye për të vazhduar këtë punë në këtë drejtim me këto forca. Se tani është bërë edhe një koalicion, një koalicion shumë i madh”, shprehet Rama.
Më tej kryeministri vijoi:
Po shkojmë drejt një unifikimi të Europës. Ky proces është proces ku kemi 1 mijë vetë që merren me negociata me gjithë sektorët dhe nuk ka asnjë minutë për të humbur. Duhet të fokusohemi te ky proces, duhet të mos ketë ndërprerje asnjë ditë ky proces. Imagjino të hyjmë ne në historira me Kujtim Gjuzin. Kujtim Gjuzi është fryma pamja dhe gjithë simbolika e Shqipërisë Madhështore, ne nuk na duhet kjo ne na duhet Shqipëria në BE.
