Qytetarë, opozitare, deputete e ish deputete si dhe përfaqësues të shoqërisë civile, janë mbledhur mbrëmjen e sotme përpara Ministrisë së Brendshme në shenjë proteste për ngjarjen tragjike në Himarë.
Një prej qytetareve ka kritikuar kryeministrin Rama për të cilin u shpreh se ende pa u mbyllur plaga e familjes Avdia, e cilësoi sezonin turistik si një sukses.
“Ju duhet të jepni dorëheqjen, sepse është e shtrenjtë karrigia për ju. Kryeministër, dole pa u mbyllur plaga e ngjarjes tragjike. Ju dolët dhe thatë se ky është sezoni më i mirë ndonjëherë turistik. Ju duhet të heshtnit.
Vetëm këtë fjalë nuk mund ta publikonit në rrjete sociale. Duhet të shkarkonit menjëherë dy ministrat dhe drejtorin e policisë.
Mos të flasim për Presidentin e Republikës, i cili sapo hyri në institucion, filloi pushimet dhe heshti për vdekjen e 7 vjeçares shqiptare. Nuk kemi siguri për vete dhe as fëmijët tanë. Kësaj i thonë me të vra dhe mos me të lënë të qash” – tha një qytetare.
Një tjetër qytetar ka paralajmëruar vijimin e protestave, duke u shprehur se populli do i trazojë gjumin këtij regjimi.
“Do ja trazojmë gjumin këtij regjimi. Regjimi që ka barriera me popullin e vetë.Është akti më normal që të jepet dorëheqja dhe të largohen të gjithë përgjegjësit” – tha një tjetër qytetar./m.j
