Djali i Belerit flet nga Athina: Babai im ra pre e mashtrimit, Mitsotakis e njeh personalisht

Djali i Fredi Belerit, Petro Beleri ka folur për herë të parë pas arrestimit të Fredi Belerit dy ditë para zgjedhjeve vendore të 14 majit.

Në një intervistë ekskluzive për Euronews Albania, ai tha se i ati është në gjendje të mirë shëndetësore ndërsa po pret me gjakftohtësi vendimet që do të marrë Gjykata.

“Kur kam qenë në Tiranë të gjithë njerëzit që ishin atje na mbështesnin dhe na shikonin në mënyrë emotive. Të gjithë na thonin se çfarë është kjo gjë kështu. Të gjithë e dinë se çpo ndodh.

Babai im është gjakëftohtë dhe po pret Gjykatën që të nxjerrë vendimin, po pret procedurat dhe zhvillimet që do të kryen. Me shëndetin është mirë për momentin “- është shprehur djali i Fredi Belerit, Petro Beleri.

Ai tha se ishte opozita e bashkuar ajo që i besoi Belerit garimin në qytetin bregdetar, duke parë dhe mbështetjen që ai gëzonte në zonë.

“Ka qenë opozita e bashkuar ajo që e zgjodhi dhe e vendosi si kandidatur babain tim dhe në 2015-ën dhe në 2019”, tha ai.

Petro Beleri u pyet dhe nëse ka pasur kërcënime ndaj familjes së tij, gjatë fushatës elektorale ose më pas.

Ai theksoi se në jetën reale nuk kanë pasur kurrë kërcënime, përveç komenteve negative në rrjete sociale.

“Gjatë fushatës ne nuk kemi pasur kërcënime, është tjetër pamja që shfaqet në televizione dhe tjetër pamja që ne kemi në Himarë dhe Shqipëri, apo kudo ku shkojmë. Kërcënime në media sociale kemi pasur, por në jetën reale asgjë nuk ka qenë e vlefshme. Jetojmë në harmoni të plotë”, tha Beleri.

Ai nënvizoi gjithashtu dhe mbështetjen e Athinës për rastin e babait, ku tha se kryeministri Mitsotakis e njeh personalisht të atin.

Sipas tij, interesi i shtuar i Athinës vjen për shkak se ata janë qytetarë grekë.

“Natyrshëm që po kemi pasur mbështetjen e Athinës. Këtu madje lidershipi politik ka treguar interes për këtë çështje, pasi ne jemi qytetarë grek. Në Himarë nuk jeton vetëm komuniteti shqiptar por dhe komuniteti grek. Ju duhet ta perceptoni se kjo gjë është e vetëkuptueshme. Zoti Mitsotakis ka ardhur më 22 dhjetor në Himarë, na ka vizituar, na ka takuar nga afër dhe e ka takuar personalisht tim atë. Ju e kuptoni se ai nuk mund t’i pranojë disa gjëra.

Sigurisht që duhet të jemi vende mike, por kjo gjë duhet të zgjidhet. Familja evropiane ka disa rregulla ashtu edhe fqinjësia e mirë ka disa regulla. Për marrëdhëniet mes dy qeverive nuk dua të bëj asnjë koment”, tha ai.

Arrestimin e Belerit, i biri e konsideron si rrëmbim duke shtuar se i ati ra pre e një mashtrimi që iu bë. Mes tjerash ai nënvzoi se objektivi i të atit është që të zhvillojë Himarën.

“Drejtësia në Shqipëri duhet të funksionojë në mënyrë të pavarur dhe të paanshme. Nëse kjo do të ndodh atëherë shumë shpejt do të bëhen gjërat e kuptueshme. Domethënë, babai im të shkojë në pozitën e caktuar dhe e gjithë kjo skenë që është stisur në mënyrë kaq të keqe të bjerë në tokë. Objektivi i popullit himariot por dhe i babait tim është të mos krijojë probleme por të zhvillohet Himara dhe integrimi i Shqipërisë në familjen europiane.  Kam qenë në kontakte të vazhdueshme me tim atë. Bëhet fjalë për një rrëmbim. Ne e pamë të gjithë se si u bë ai rrëmbim dhe këtë dikush e përkthen si arrest i menjëhershëm. Ne kemi pamjet e atij arestimi. Bëhet fjalë për një mashtrim, babai im ra pre”-tha ai.

Gjithashtu ai theksoi se dëshmitarët që kanë dëshmuar kundër Belerit janë të paguar në polici, ndërsa shtoi se janë thënë shumë gjëra që sipas tij nuk janë të vërteta.

“Dëshmitarët që kanë thënë për tim atë janë paguar nga policia. Është dhe një dëshmitarë tjetër që është komandanti i postës së policisë së Himarës që tha se i kanë dhënë para dëshmitarët e kanë udhëzuar Arsen Ramën që të ngrejë këtë skenë por askush nuk mbante mend nëse kishte korrupsion në zgjedhje. Askush nuk mbanin mend shumë gjëra, por mbanin mend vetëm atë skenë që kishin ngritur ata vetë.”-tha Petro Beleri.

/f.s