Manchester United ka arkëtuar tri pikët e para në ndeshjen e parë të sezonit 2016/2017 në Ligën Premier, pas fitores prej 3-1 ndaj Bournemouth në udhëtim ku realizoi në debutim superylli i transferuar, Zlatan Ibrahimovic.
United e nisi më përgjumshëm këtë takim, duke mos kërkuar dominimin e madh.
Ishin vendasit ata që provuan të dalin rrezikshëm, por mbrojtja e United sidomos me Baillyn u tregua e pathyeshme, çka është paralajmërim për një mentalitet të fortë defensiv që po instalon Jose Mourinho.
Pas 40 minutash lojë, një gabim të mbrojtjes e shfrytëzoi Mata, i cili nga afërsia shënoi për 1-0 dhe hapjen e serisë së golave.
Me të filluar pjesa e dytë United filloi të shtrinte edhe më shumë dominimin duke mbajtur më shumë topin.
Një top të devijuar nga Martial e pranoi bukur Rooney i cili me kokë shënoi për 2-0 dhe epërsinë e dyfishtë të Djajve të Kuq (59’).
Kur të gjithë po e vënin në pikëpyetje nëse edhe Ibra do t’i shtohej listës së golashënuesve, u shfaq pikërisht suedezi.
Ai me një predhë nga distanca befasoi portierin e Bournemouthit, duke realizuar një supergol në debutimin e tij me Unitedin në ndeshje zyrtare dhe ndeshjen e parë të tij në karrierë në Ligën Premier (64’) për 3-0.
Një gol sa për statistika e shënoi Smith për Bournemouthin në minutën e 69-të.
Deri në fund nuk pati ndonjë ndryshim fundamental në rezultat. Telegrafi/