Ndërsa trupat e ushtrisë ukrainase po luftojnë çdo ditë në fushat e minuara nga Rusia në lindje të vendit, një grup snajperësh elitarë po synojnë ushtarakët rusë të profilit të lartë.
Grupi i snajperëve, të quajtur “Djajtë dhe Engjëjt”, sipas një raporti të fundit nga “The Wall Street Journal”, kanë objektiva të eliminojnë komandantët rusë me qëllim mbjelljen e kaosit në radhët e armikut. “Nëse drejtuesi i grupit të ushtarëve do të eliminohet, atëherë njësia do të jetë e çorganizuar”, tha ish-gjeneralmajori Robert Scales.
Snajperët, që janë stërvitur në një rajon pranë Bakhmutit, thanë për Wall Street Journal se janë duke u perfeksionuar në kamuflimin e tyre me terrenin për të qenë të padukshëm nga armiku. “Ne punojmë në heshtje, jemi të padukshëm”, tha një nga snajperët.
Në një intervistë të mëparshme për CNN, ata janë shprehur se misioni i tyre është të terrorizojnë dhe demoralizojnë në maksimum trupat ruse. Mark Cancian, një këshilltar i lartë në Qendrën për Studime Strategjike dhe Ndërkombëtare, tha për “The Wall Street Journal” se “snajperët po bëhen shumë të rëndësishëm tashmë që palët ushtarake po pozicionohen në llogoret e tyre dhe po luftojnë prej muajsh”.
Ata thonë se po ndihmohen shumë edhe nga teknologjia, e cila i lejon ata që të shohin gjatë natës, të identifikojnë dhe godasin objektivat e tyre. Në muajin qershor, një snajper ukrainas qëlloi mbi Vladimir Andonov, pjesë e grupit Wagner në atë kohë, i cili njihej si “The Executioner”, një nga mercenarët më famëkeq të presidentit Vladimir Putin.
/a.r
