Presidenti amerikan, Barack Obama dhe Zonja e parë Michelle Obama, kanë organizuar një koncert në Shtëpinë e Bardhë, duke shënuar kështu pesë vjetorin e Ditës Ndërkombëtare të Jazzit.
Obama ka thënë se dashurinë për muzikën jazz e ka nga koha kur babai i tij, të cilin ai e ka njohur pak, kur e kishte dërguar në një koncert ku performonte Dave Brubeck, në Honolulu të Hawait në vitin 1971, transmeton KTV.
“Në atë kohë nuk e kuptoja, por bota të cilën e hapi ai koncert për një djalosh 10 vjeçar, ishte spektakolare,” u shpreh Obama.Superyjet e muzikës sikurse Aretha Franklin, Sting, Diana Krall dhe Herbie Hancock, performuan në koncert së bashku me disa muzikantë të tjerë.
“Zoti president unë thjesht dua t’ju them se ju vlerësoj shumë dhe dua t’ju falënderoj shumë për mënyrën se si e udhëhoqët popullin tonë,” theksoi Franklin.
Kjo ditë ka nisur të shënohet për ta theksuar fuqinë e jazit si forcë për liri dhe kreativitet, duke promovuar dialogun ndërkulturor përmes respektit, dhe duke i bashkuar njerëzit nga të gjitha anët e botës, thonë organizatorët.Dita ndërkombëtare e Jazz-it më parë ishte organizuar në Stamboll në vitin 2013, Osaka më 2014 dhe në Paris vitin e kaluar. (B.an)
