Deputetja e Partisë Demokratike Jozefina Topalli ka shpërthyer në akuza në drejtim të kryeministrit gjatë diskutimeve për buxhetin faktik të vitit 2014. Nga foltorja e parlamentit, Topalli e ka cilësuar vitin e shkuar si vitin e skandaleve historike korruptive.
“Buxheti i vitit të kaluar është një buxhet historik. Historik për gropën më të madhe të financave në historinë e shtetit. Buxhet që filloi si “Sude”, dhe mbyllet pak a shumë si Shvejku. Është buxheti i absurdit sepse ka vendosur taksat më të larta. Ky është edhe buxheti i skandaleve që fillon me tenderat dhe kulmon me megaaferën, skandalin më të madh të shekullit, atë të CEZ. Ky është buxheti 489 tendera 389 janë me shkelje. Nga një auditim që është bërë, kemi një dëm prej 600 mln euro”, deklaroi Topalli.
Ajo komentoi edhe ngjarjen e pak ditëve më parë kur kreu i qeverisë u godit me vezë nga disa studentë.
“Kemi dëgjuar për dorëheqjen e kryeministrit rumun Ponta, mik i kryeministrit tonë. Një grup të rinjsh qëlluan me vezë kryeministrin. Veza është shenjë e revoltës. Është një shenjë shumë e rëndësishme. Goditja me vezë nuk është vetëm për ligjin e arsimit. Është një alarm i fortë për kryeministrin, për të gjithë korrupsionin dhe vuajtjen që i ka shkaktuar kësaj shoqërie”, tha Topalli.
Ajo bëri thirrje për protesta masive deri në dorëheqjen e kryeministrit Edi Rama.
