Kreu i LZHK-së, Dashamir Shehi i cili ditë më parë u përfol edhe si një prej emrave të mundshëm për të qenë kandidat për postin e presidentit, ka folur lidhur me zhvillimin e procesit ku në fund Bajram Begaj u zgjodh kreu i ri i shtetit.
Në emisionin “frontline”, Shehi tha se opozita e cila ishte e përçarë nuk kishte pasur qartësi në emrat që donin për president, ndërsa shtoi se shumë persona e kanë përdorur si rast vetëm për të dalë para kamerave.
“Procesi ka mbaruar, dhe po i çoj sinjal kolegëve të mi opozitarë se ku kanë gabuar. Disa nga marria dhe budallallëku dhe disa që mendojnë se janë bërë protagonistë duke dalë në media. Protagonizmi bosh. Ato zotërinjtë e opozitës duhet ti merrnin këto burra e disa të tjerë dhe të nxirrnin një që t’ia ofronin palës tjetër dhe shqiptarëve. Këta hynë në një marrëdhënie absurde. Këta duhet të prodhonin presidentin e vetë. Ne hymë në një betejë për të nxjerrë personazhet e opozitës shqiptare. Opozita e humbi këtë nga budalliqet e veta. Kishte tre raunde për të nxjerrë jo një por disa kandidatë se të gjithë mendonin se do t’ia jepte pala tjetër. Po pse t’ia jepte”, tha kreu i LZHK.
Mes të tjerash, Shehi kritikoi edhe ish-kryeministrin Sali Berisha për ndryshimet kushtetuese të bëra në vitin 2008, pasi sipas tij fakti që kompetencat e Presidentit janë bërë thuajse të papërfillshme vjen si shkak i marrëdhënies me Ramën.
“Shume nga defektet e politikës që kemi ne në Shqipëri janë derivat i marrëveshjes famëkeqe të 2008. Është bërë praktikisht me kancelar Shqipëria, s’ka më president dhe kryeministër se është bërë partia, një parti që e nxjerr atë. Thotë Berisha se ne dhe Bjellorusia që kemi udhëheqës monist, por ai është protagonist kryesor i kësaj. Ajo shkatërroi institucionet dhe e dyta u bë një ligj zgjedhor që ka prodhuar një shkretëtirë politike. Që prej asaj kohe nuk ka dalë një forcë e re politike. Ky ligj dhe ajo kushtetuta e asaj kohe ka prodhuar këtë klime të sëmurë politike. Ata janë bashkë por s’vlen për Shqipërinë kjo punë. Se ata e kanë bërë që të jenë vetëm ata. S’ka më demokraci, kontrollon një personazh i vetëm. Ti gërthet sa të duash kundër vjedhjes dhe korrupsionit siç thotë Berisha. Të gjitha këto i thotë mirë Berisha, por nuk thotë një gjë që është protagonist i vetë këtyre gabimeve”– deklaroi Shehu.
/e.d
