Pikëpyetjet për 25 qershorin, datë kjo e përcaktuar nga marrëveshja Rama-Basha për mbajtjen e zgjedhjeve parlamentare, janë të shumta sa i takon kuadrit ligjor, dekretit të presidentit por edhe afatit vetëm 29 ditor për organizimin e procesit.
Ish-kryetari i KQZ, Kristaq Kume, tha në studion e Report Tv se përpara dekretimit të 25 qershorit, nevojitet një dispozitë kalimtare në Kodin Zgjedhor për të shfuqizuar datën 18 qershor, të dekretuar nga Presidenti në dhjetor të 2016-ës.
“Nevojitet dispozitë kalimtare në Kodin Zgjedhor për të nxjerrë jashtë loje 18 qershorin, për të ricaktuar datën e zgjedhjeve në 25 qershor. Kushteuta ia ka deleguar për të përcaktuar datën, Presidentit, 9 muaj përpara përfundimit të mandatit dhe Presidenti e ka bërë në dhjetor të 2016.
Jemi në kushtet kur dakordësia politike është e tillë që nuk do zhvillohen zgjedhje në 18, por Presidenti duhet të angazhohet dhe të ndryshojë nenin e mëparshëm për të dekretuar një datë të tillë që nuk bie ndesh me kushtetutën sa i takon kohës që duhet të zhvillohen zgjedhjet.
Kushtetuta thotë se zgjedhjet duhet të kryhen brenda 2 të dielave të fundit të qershorit, pra Kodi ka përcaktuar këto dy data. Mes këtyre dy datave presidenti ka zgjedhur datën 18 qershor. I kërkohet Presidentit të ricaktojë datën sipas marrëveshjes politike”, u shpreh Kume.
“Pikëpyetje pse u anuluan koalicionet”
Konstitucionalisti i njohur ngre pikëpyetje sa i takon përjashtimit të koalicioneve nga zgjedhjet e ardhshme .
“S’e kuptoj pse nuk kanë caktuar datë dhe për regjistrimin e koalicioneve. Përsa kohë kjo është marrëveshja mes dy forcave, të cilat bëjnë mbi 84 vota, mundësinë reale e kanë për të bërë një gjë të tillë. Të mos lejojnë me ligj mosregjistrimin e koalicioneve, për mendimin tim nuk është normale.
Sigurisht që kjo fitojnë partitë e mëdha dhe të dobëta dalin partitë e vogla pasi do përplasen me partitë e mëdha”, theksoi Kume./a.m.
