Dhunoi një italian homoseksual, arrestohet për homofobi shqiptari në Xhenova
Tre të rinj u arrestuan, mes të cilëve edhe një shqiptar, për rrahjen barbare të një 44 vjeçari në një autobus të Xhenovës, ngjarje që ndodhi më 14 korrik, sepse menduan se ai ishte homoseksual.
Jurgen Ndrelalaj 18 vjeç, Lorenzo Xhuliani 19 vjeç dhe Federiko Burlando, 19 vjeç u ndaluan dhe arrestuan të dielën dhe rrezikojnë të dënohen deri në 10 vjet burg. Ngjarja ka si motiv homofobinë. “Ai ishte trukuar në fytyrë si një homoseksual dhe e godita bashkë me të tjerët -tregoi për policinë Ndrelalaj”.
Për arrestimin e tre të rinjve ishte vendimtare dëshmia e studentes shqiptare, Megi Burhamaj, e cila, sëbashku me një kamariere 20 vjeçare ishin nën hetim për “tentative vrasje”. Ajo tregoi gjithçka pasi kishte parë një emision televiziv, ku ishte përshkruar dhuna ndaj 44 vjeçarit.
“Kuptova që ishte rëndë dhe u ndërgjegjesova për atë që i kishin bërë. U përpoqa t’ua thoja, por ata, si mua dhe mikes time Beatrice, na kërkuan të shikojmë punët tona, ta harronim atë histori”. 19 vjeçarja shqiptare, Megi Burhamaj mohon që motivi i dhunës ekstreme të ishte homofobia. Sipas saj, shkak për konfliktin ishin bërë komplimentet që miku anglez i baristit 44 vjeçar u kishte drejtuar dy vajzave. Duke iu referuar mediave italiane, pas ngjarjes, baristi 44 vjeçar i kishte treguar të fejuarës, se shkak për konfliktin ishte bërë njëra nga vajzat që i kishte thënë: “Pse ma shikon të dashurin, mos je gjë gay?”.
