Kryetari i degës së Lëvizja Vetëvendosje në Skënderaj, Hysni Mehani, ka deklaruar se është sulmuar fizikisht nga kryetari i komunës, Sami Lushtaku, dhe persona që ai i cilësoi si pjesë e “bandës” së tij.
Përmes një reagimi në rrjetet sociale, Mehani pretendoi se gjatë incidentit i është marrë edhe telefoni personal.
“Te dashur miq jam sulmuar nga Sami Lushtaku dhe banda e tij. Telefonin personal ma kanë marrë. Lus policinë të mbrojë familjen time dhe ftoj familjarët për përmbajtje”, shkroi ai.
Deri tani, Policia e Kosovës nuk ka dhënë detaje zyrtare lidhur me rastin.
Mehani, i cili së fundmi është emëruar zëvendësministër i Financave, sipas reagimit të Lëvizja Vetëvendosje, është sulmuar në kafeterinë “Solo” në qendër të Skënderajt, teksa ndodhej duke pirë kafe me deputeten Arjeta Fejza dhe aktivistë të partisë.
Në deklaratën e publikuar nga LVV thuhet se situata degradoi në dhunë fizike.
“Fillimisht, Hysni Mehani është goditur me grusht, ndërsa më pas edhe me gotë në kokë. Pas përpjekjes së Sekretarit të Qendrës, Bahri Zabeli, për të parandaluar përshkallëzimin, është sulmuar dhunshëm nga shoqëruesit e Sami Lushtakut edhe ai duke pësuar goditje të rënda”, thuhet në reagim.
Sipas Vetëvendosjes, Mehani po merr trajtim mjekësor pas incidentit.
Partia e kryeministrit të Kosovës e cilësoi ngjarjen si “sulm fizik banditesk” dhe kërkoi reagim urgjent nga organet e drejtësisë.
“Kërkojmë nga organet kompetente të trajtojnë rastin me urgjencë dhe të ndërmarrin veprimet e nevojshme ligjore ndaj përgjegjësve. Po ashtu, kërkojmë nga Partia Demokratike e Kosovës dënimin e këtij akti”, thuhet më tej në deklaratë.
LVV shtoi se ngjarje të tilla nuk do të frikësojnë aktivistët dhe mbështetësit e saj.
“Lëvizja VETËVENDOSJE! dënon ashpër këtë sulm fizik, por njëkohësisht u tregon gjithë këtyre se nuk mund ta trembin as ta frikësojnë asnjë aktivist të Lëvizjes VETËVENDOSJE! e qytetar të Republikës”, përfundon reagimi.
