Gazetari investigativ, njëherësh drejtori i gazetës “Insajderi”, Parim Olluri është dhunuar fizikisht nga disa persona të panjohur mbrëmjen e djeshme rreth orës 22:00 afër banesës së tij.
Në momentin e sulmit, ai ka qenë i shoqëruar nga bashkëshortja e tij, e cila ka humbur ndjenjat.
Gazetari Parim Olluri është dërguar në spital për mjekim dhe ndodhet jashtë rrezikut për jetën, ndërsa vijojnë hetimet për zbardhjen e ngjarjes dhe arrestimin e autorëve.
Gazetari: Shkrimi i fundit për komandantët …
Pas ngjarjes ai u shpreh se “Pak para orës 22.00, duke hyrë me të fejuarën time në banesë, jam sulmuar fizikisht nga persona të panjohur, të cilët nuk kam mundur t’i identifikoj.
Ata nuk folën asgjë, prandaj nuk di kush mund të jenë sulmuesit. Policia ishte në vendin e ngjarjes dhe ka marrë informatat bazike. Po pres që nga kamerat e vendosura në lokalet e bizneseve në atë rrugë të mund të identifikohen sulmuesit.
Nuk e di për cilin artikull mund të lidhet saktësisht. Për shkrimin e fundit për komandantët e UÇK-së kam pasur reagime dhe komente të shumta edhe në Facebook, por nuk e di nëse saktësisht lidhet me këtë shkrim” tha Olluri.
Presidenti i Kosovës dhe kryeministri e kanë dënuar sulmin ndaj gazetarit duke kërkuar zbardhjen e shpejtë dhe vendosjen e autorëve para drejtësisë.
a.ç
