Forcat e Ndërhyrjes së Shpejtë, “Shqiponjat” dhe RENEA-t kanë zbarkuar në zonat e Niklës dhe të Tapizës sërish mëngjesin e sotëm. Që nga ora 5.00 e mëngjesit të sotëm, Policia ka ushtruar kontrolle në disa banesa dhe shtëpi në zonën e Niklës dhe Tapizës, në kuadër të kontrolleve për kapjen e personave me precedentë penal dhe të shpallur në kërkim.
Raportohet se më shumë se 100 efektivë kanë rrethuar zonat që konsiderohen si “problematike” për shkak personazheve të botës së krimit të përqëndurar në Fushë Krujë.
Aksionet vijnë në vazhdën e kontrolleve pas ngjarjes së disa ditëve më parë në Larushkë ku si pasojë e një atentati mbeti i vrarë 29-vjeçari Ramazan Sino ndërsa u plagosën dy nipërit e tij, fëmijët e Gentjan Bejtjas. Për ngjarjen u arrestua Valter Bami, edhe pse ai e mohon pjesëmarrjen në krim.
Ndërkohë që nga ana tjetër, kontrollet mund të ushtrohen edhe për fisin Rraja. Në kërkim pas dhunës që ushtruan mbi vëllezërit Maja, janë shpallur: Flamur, Xhelal dhe Rexhep Rraja. Përkatësisht vëllezërit dhe djali i deputetit të Partisë Socialiste, Rrahman Rraja.
/f.stafa
