Ushtarë izraelitë dhe kolonë po përdorin dhunën me bazë gjinore, përfshirë sulme dhe ngacmime seksuale, për të detyruar palestinezët të largohen nga shtëpitë e tyre në Bregun Perëndimor, sipas ekspertëve të të drejtave të njeriut dhe ligjorë.
Gra, burra dhe fëmijë palestinezë kanë raportuar një sërë abuzimesh, përfshirë zhveshje të detyruar, kontrolle trupore invazive dhe të dhimbshme, ekspozim të organeve gjenitale nga izraelitët edhe në prani të të miturve, si dhe kërcënime për dhunë seksuale.
Raporti, i titulluar “Sexual violence and forcible transfer in the West Bank”, përshkruan një rritje të sulmeve seksuale dhe poshtërimit ndaj palestinezëve, si në komunitetet e tyre ashtu edhe brenda shtëpive, veçanërisht që nga viti 2023.
Forma të tjera të dhunës të raportuara përfshijnë urinimin mbi viktimat, fotografimin dhe shpërndarjen e imazheve poshtëruese të personave të lidhur dhe të zhveshur, ndjekjen e grave gjatë përdorimit të tualeteve dhe kërcënime të vazhdueshme seksuale. Shumë raste janë anonimizuar për shkak të ndjeshmërisë së lartë të temës.
Sipas studimit, këto forma dhune kanë përshpejtuar largimin e palestinezëve nga zonat e tyre. Mbi dy të tretat e familjeve të anketuara deklaruan se rritja e dhunës ndaj grave dhe fëmijëve, përfshirë ngacmimet seksuale ndaj vajzave, ishte një faktor kyç në vendimin për t’u larguar.
Dëshmitë tregojnë gjithashtu se ushtarët izraelitë të pranishëm gjatë incidenteve shpesh nuk kanë ndërhyrë për të ndaluar abuzimet apo për të ndëshkuar përgjegjësit. Në një rast, një grua u detyrua t’i nënshtrohej një kontrolli të dhimbshëm trupor nga dy ushtarë, pasi iu kërkua të zhvishej plotësisht brenda shtëpisë së saj.
Edhe burrat dhe djemtë janë raportuar si viktima të dhunës seksuale dhe poshtërimit publik. Në disa raste, sipas dëshmitarëve, viktimat janë zhveshur, rrahur dhe fotografuar në mënyrë degraduese.
Pasojat e kësaj dhune janë të thella edhe për komunitetet që nuk janë zhvendosur. Shumë vajza kanë ndërprerë shkollimin për të shmangur rrezikun e abuzimit, ndërsa gra të shumta kanë lënë punën. Raporti evidenton gjithashtu një rritje të martesave të hershme, si një përpjekje e familjeve për të mbrojtur vajzat e tyre.
Organizata ‘Women’s Centre for Legal Aid and Counselling’ ka dokumentuar gjithashtu raste të dhunës seksuale ndaj grave dhe vajzave palestineze, duke përfshirë abuzime gjatë kontrolleve dhe sjellje poshtëruese në pika kontrolli.
Ekspertë të tjerë theksojnë se rritja e këtyre rasteve ndodh në një klimë mos-ndëshkueshmërie. ‘Physicians for Human Rights – Israel’ vlerëson se mungesa e ndjekjes penale për raste të tilla ka krijuar një kulturë tolerimi ndaj dhunës.
Ndërkohë, ushtria izraelite, nuk ka dhënë përgjigje lidhur me akuzat për abuzime seksuale nga ushtarët e saj.
Raporti bazohet në 83 intervista me komunitete palestineze në të gjithë Bregun Perëndimor dhe synon të hedhë dritë mbi një fenomen që, sipas autorëve, mbetet i nënraportuar dhe me pasoja të rënda humanitare.
