Kryeministri Edi Rama u shpreh se shteti ka reaguar në mënyrë të menjëhershme për atë që ndodhi në protestën e Zvërnecit.
“Sjellja e kompanisë së sigurisë ishte e neveritshme dhe jo më pak e neveritshme ishte sjellja e drejtuesve të sigurisë vendore, gjë për të cilën ka pasur reagim të menjëhershëm nga ana e lidershipit të Policisë së Shtetit, qoftë me shkarkimin e drejtorit të Policisë së Vlorës dhe vendosjen nën hetim të gjithë zinxhirit, heqjen e licencës së kompanisë, arrestimin dhe ndjekjen penale të sigurisë. Nuk di se çfarë tjetër mund të bëjë shteti. Nuk ka asnjë relativizim të dhunës, edhe për atë relativizim, u kërkua ndjesë, u bë edhe shkarkimi dhe vendosja nën hetim e gjithë zinxhirit”, tha Rama, shkruan A2.
Sipas kryeministrit, nuk ka akoma studim mjedisor për projektin dhe “lufta nuk po bëhet me një gardh skandaloz me tela me gjemba, për të cilin kompania do të paguajë një gjobë të majme”.
“Pastaj, për dhunën, ajo kompania tjetër nuk do të punojë më në Republikën e Shqipërisë”, theksoi më tej Edi Rama.
