BE dhe vendet që kërkojnë të hyjnë në familjen evropiane duhet të përafrojnë politikat e tyre të jashtme dhe ato të sigurisë në mënyrë që të mbrojnë interesat e përbashkëta përball sfidave të ndryshme. Kjo ishte thirrja që ambasadori i BE-së në Tiranë, Silvio Gonzato bëri nga Kuvendi gjatë sesionit plenar të Asamblesë Parlamentare të Nismës së Evropës Qendrore.
Ai u ndal edhe tek aktet e dhunës nga opozita në Kuvend. “Ndjej keqardhje për situatën e krijuar, është për të ardhur keq”, tha ai.
Gonzato bëri thirrje që të ulen tensionet dhe të shmangen sulmet.
“Është për të ardhur keq që për një çështje tjetër disa përfaqësues të opozitës përdorën mënyra që ndërpresin mbarëvajtjen e jetës parlamentare në kuvend. Është për të ardhur keq. Për çfarëdo ideje që kemi nuk është kjo mënyra për ta shprehur mendimin.
Në një demokraci funksionale si Shqipëria pakënaqësitë duhet të shprehen në mënyrën e duhur e nuk duhet të përdoren dhunë apo dëmtime ndaj pronës për të shprehur mendimin, deputetët e kuvendit duhet të kenë mundësinë të përmbushin rolin e tyre në siguri të plotë”, tha ambasadori i BE-së në një reagim për gazetarët jashtë sallës së Kuvendit.
/a.r
