NATO dhe Bashkimi Evropian kërkuan sot paqe në Ballkan pas dënimit me burgim të përjetshëm të ish-shefit ushtarak të serbëve të Bosnjes, Ratko Mladiç, për gjenocid, krime kundër njerëzimit dhe krime lufte.
“Kjo tregon se shteti i të drejtës funksionon dhe se ata që janë përgjegjës për krime lufte duhet të japin llogari”, theksoi sekretari i përgjithshëm i NATO-s, Jens Stoltenberg, në një komunikatë.
I ashtuquajtur “Kasapi i Ballkanit”, Ratko Mladiç u dënua me burgim të përjetshëm nga Gjykata Penale Ndërkombëtare për ish-Jugosllavinë (TPIY), me seli në Hagë, për gjenocid, krime kundër njerëzimit dhe krime lufte.
“Shpresoj që ky gjykim do të inkurajojë rajonin e Ballkanit të avancojë në rrugën e paqes dhe pajtimit”, deklaroi Stoltenberg duke nënvizuar se Mladiç ishte shpallur fajtor për krimet çnjerëzore kundër civilëve, veçanërisht në Srebrenicë gjatë verës së vitit 1995.
Nga ana e tij, Bashkimi Evropian u kërkoi të gjitha vendeve të Ballkanit të nderojnë viktimat nga krimet e luftës dhe të punojnë në favor të paqes në rajon./b.d
