Nën drejtimin e kryetarit Erion Braçe, Komisioni i Posaçëm “Për të koordinuar dhe mbikëqyrur të gjitha veprimet institucionale për të luftuar dezinformimin dhe format e tjera të ndërhyrjes së huaj në proceset demokratike të vendit”, u mblodh sot për të shqyrtuar dy projektvendime dhe Draftstrategjinë Kombëtare Kundër Ndërhyrjeve të Huaja dhe Dezinformimin 2025-2030.
Në nisje, Komisioni miratoi dy projektvendime: “Për një shtesë në Vendimin nr. 07, datë 26.09.2024, të Komisionit, “Për caktimin e ekspertëve” dhe Projektvendimin “Mbi shpërblimin dhe masën e tij, për ekspertët e atashuar pranë Komisionit të Posaçëm Parlamentar”.
Më tej komisioni vijoi me prezantimin dhe diskutime mbi Draftstrategjinë Kombëtare Kundër Ndërhyrjeve të Huaja dhe Dezinformimin 2025-2030.
Grupi i ekspertëve të pranishëm folën për katër objektivat strategjikë në luftën kundër ndërhyrjeve të huaja dhe dezinformimin 2025-2030.
Sa i përket objektivit të katërt, për mbrojtjen dhe forcimin e lirisë së shprehjes, lirisë së medieve të pavarura për të luftuar dezinformimin, Erjon Tase foli për zhvillimin e kapaciteteve të organizatave të shoqërisë civile dhe medieve të pavarura për të luftuar dezinformimin, mbështetjen e gazetarisë investigative dhe kërkimit të pavarur të fakteve në luftën kundër dezinformimit, si dhe promovimin e informacionit të besueshëm, rritjen e ndërgjegjësimit dhe edukimit mediatik, si dhe fuqizimi i aftësive digjitale të qytetarëve me qëllim forcimin e rezistencës shoqërore ndaj dezinformimit.
Erion Tase tha se objektivi ynë është fokusuar te forcimi i lirë së medias dhe angazhimi dhe ndërgjegjësimi publikut kundër dezinformimit.
“Është detyrimi i shoqërisë civile dhe medieve për të luftuar dezinfomimin, objektivi i dytë mbështetja e gazetarisë investigative dhe kërkimit të fakteve të pavarura kundër dezinformimit dhe objektiv i trete promovimi i informacionit të besueshëm, rritja dhe edukimi mediatik dhe fuqizimi i aftësive digjitale të qytetarëve me qëllim forcimin e rezistencës shoqërore ndaj dezinformimit,” tha Tase.
Sipas tij “aktualisht situata në vendin tonë është duke u fokusuar tek evidentimi i problematikave dhe monitorimi i informacionit që vjen nga aktorët e huaj nëpërmjet mediave online dhe tashmë ne kemi agjenci shtetërore të aktorëve të huaj që tashmë kanë seksionin në gjuhën shqipe, siç është Agjencia Iraniane dhe ajo kineze dhe informacioni u shërben edhe shqiptarëve në rajon në Kosovë, Mal të Zi e Maqedoni, por dhe kudo ku ka shqiptarë”.
Ai deklaroi se “jemi dakordësur të kemi edukim formal dhe jo formal në shkollat shqiptare, si detyrim për të edukuar të rinjtë, por kemi nevoja për të edukuar edhe kategori të tjera të shoqërisë. Zbatimi i programeve të tjera edukuese për gazetarë dhe zyrtarë, për të kuptuar dezinformimin, që mund të vi edhe nga kopjimi i lajmeve nga portale të ndryshme”.
Ai parashtroi nevojën e zgjerimin e trajnimeve për verifikimin e burimit të informacionit dhe promovimit të medias për rezistencë ndaj dezinformimit.
Në përfundim, Braçe bëri me dije se grupi i ekspertëve do të vijojë konsultimet dhe më pas Draftstrategjia Kombëtare Kundër Ndërhyrjeve të Huaja dhe Dezinformimin 2025-2030 do të kalojë për konsultim publik, ku së bashku me opinionet që do të vijnë nga këto konsultime do t’i adresohen Kuvendit për diskutime në komisionet parlamentare.
