Komisioneri Hahn foli edhe për bisedimet Shqipëri-Greqi, gjatë konferencës për shtyp me kryeministrin Edi Rama, në Bruksel
Hahn u pyet nga gazetarët rreth deklaratës së tij në një konferencë për mediat gjatë Samitit të Londrës, ku deklaronte do të ketë një ‘ristrukturim kufijsh mes Shqipërisë dhe Greqisë’, por komisioneri nuk preferoi të fliste rreth kësaj çështje.
“Preferoj të mos bëj ndonjë koment tjetër, më vjen keq që ka pasur keqkuptime, ka pasur të bëjë me një sqarim për vijën kufitare, asgjë më shumë dhe asgjë më pak dhe nuk është asgjë e madhe”, deklaroi Hahn.
Hahn tha se BE nuk do të pranojë asnjë shtet të ri që ka konflite të pazgjidhura me fqinjët, ndërsa la të kuptohet se pas dy javësh mund të përmbyllet marrëveshja Shqipëri-Greqi
“BE nuk do të pranojmë asnjë shtet të ri anëtar që ka konflikte të pazgjidhur me vendet fqinjë. Kemi parë progres mes Maqedonisë dhe Greqisë për çështjen e emrit, kemi parë progres edhe në Kosovë për kufirin me Malin e Zi, të njëjtën gjë shohim edhe në bisedimet Shqipëri-Greqi. Nuk dua të bëj komentë të tjera. Pas dy javësh gjithçka do të bëhet, gjithçka mund të bëhet”, deklaroi Hahn
Kryeministri Edi Rama theksoi se bisedimet kanë shënuar progres, megjithëse ka patur vështirësi.
Kryeministri garantoi se në fund të marrëveshjes kushdo që akuzon për tradhti nga të dyja palet, do të turpërohet
“Me Greqinë kemi bërë shumë progres, janë diskutime që përfshijnë 70 vite, që nga ligji i luftës, deri tek ndarja e detit. Janë diskutime të vështira, nuk janë finalizuar por kemi bërë shumë progres. Historia ka qenë pengesë, pasi hijet e të kaluarës kanë dalë në sfond. Jam i sigurtë që kur të finalizohet marrëveshja, kushdo që akuzon për tradhti nga të dyja palet, do të turpërohet.”, tha Rama
Javanews/a.ç
