Policia e Elbasanit ka siguruar detaje të reja nga atentati mafioz që i mori jetën biznesmenit Saimir Beqiri, vëllait të Gentian Beqirit që u vra disa vite më parë në banesën e tij.
Sipas policisë, viktima ndiqej prej disa ditësh nga atentatorët, derisa u ekzekutua mëngjesin e së hënës pranë karburantit në pronësi të tij. Personat që e ndiqnin lëviznin me një automjet tip benz dhe mbanin paruke.
Policia ka arritur në këto konkluzione pasi ka kqyrur kamerat e sigurisë në vendin ku u ekzekutua Beiqiri. Po ashtu, janë kqyrur disa kamera sigurie edhe përgjatë itinerarit që ka ndjekur viktima dhe vrasësit. Mësohet se ai është qëlluar nga njëri prej dy personave që e ndiqnin. Nuk dihet nëse policia ka identifikuar autorët e krimit, por bëhet me dije se janë shoqëruar të paktën 15 persona.
Për momentin pista kryesore e hetimit është ajo e hakmarrjes, pasi familja Beqiri ka një histori të gjatë konflikti me familjen Çapja. Policia po heton edhe mundësinë e lidhjes së ngjarjes me masakrën e disa javëve më parë në Elbasan, në lokalin në pronësi të familjes Çapja.
