Një orë mësimi në gjimnazin “Eqerem Çabej” në Tiranë, për pak u kthye në tragjedi. Në orën e tretë të mësimit, në lëndën e Informatikës, dy djem kanë nisur të zihen me njëri-tjetrin.
Xhejms Gjura u zu me shokun e klasës Franko Rrapi, të cilin më pas e kërcënoi duke nxjerrë thikën.
Mes kaosit të krijuar, mësuesja është kërcënuar nga nxënësi gjatë ndërhyrjes për t’i ndarë të rinjtë. E po këtë guxim e ka marrë edhe një vajzë 16-vjeçare që ndërhyri fizikisht për t’i ndarë shokët.
Por ajo përfundoi e plagosur, pasi u godit aksidentalisht me thikë në vetull nga shoku i klasës. Të gjithë nxënësit i kërkuan shokut të klasës të heqë thikën, por ishte e pamundur. Pasi la të plagosur shoqen.
E plagosura J.S mori mjekim dhe është jashtë rrezikut
Xhejms Gjura është larguar me thikë, e po ashtu ka kërcënuar edhe rojën e shkollës, i cili kërkoi ta ndalonte.
Drejtoria e Shkollës reagoi për ngjarjen, duke deklaruar se ka përjashtuar nga shkolla të dy nxënësit, kjo të paktën deri në sqarimin e plotë të asaj që ndodhi në klasë, edhe nga organet ligjzbatuese që kanë nisur hetimin për ngjarjen./a.m.
