Dy të vdekur dhe 4 të plagosur ishte bilanci tragjik i një konflikti të ndodhur në një lokal në njësinë administrative Dajç të Shkodrës mbrëmjen e së hënës. Ngjarja ndodhi rreth orës 22.40 të mbrëmjes pas konfliktit për një lojë pokeri midis autorit të krimit të shpallur në kërkim dhe viktimave.
Shtetasi Miklovan Parubi, i shpalur tashmë në kërkim, ka hapur zjarr ndaj disa personave të cilët ndodheshin të gjithë në një tavolinë. Për paosjë, kanë humbur jetën dy persona, Arjet Saiti 42 vjeç dhe Gacalin Kopshti 30 vjeç. Po ashtu, të plagosur mbetën 4 person, Aleks Prendi, 40 vjeç, Vinçens Kopshti, 26 vjeç, Ndok Marku, 35 vjeç dhe Kitas Molla 26 vjeç. Këta shtetas sipas burimeve spitalore janë jashtë rrezikut për jetën.
Ndërkohë, autori i krimit pas këtij akti të rëndë u largue me shpejtësi në drejtim të paditur. Policia prej mbrëmjes së djeshme ka ngritur pika të shumta kontrolli në zonë dhe po punon për kapjen e shtetasit Miklovan Parubi, i cili njihet si person problematik dhe përdorues i lëndëve narkotike. Në operacion janë përfshirë edhe Forcat e Ndërhyrjes së Shpejtë.
*Në foto autori i krimit, Miklovan Parubi
Njoftimi i policisë:
Me datë 03.10.2016, rreth orës 22: 40, është marrë njoftim se në një lokal tek kryqëzimi i Dajçit, Shkoder, ka të shtëna me armë zjarri.
Menjëherë në vendngjarje kanë mbërritur shërbimet policore që kanë konstatuar se pas një konflikti për motive të dobëta ( dyshohet gjatë një loje pokeri) , shtetasi Miklovan Parubi, 33 vjeç, ka vrarë me armë zjarri shtetasit Arjet Saiti 42 vjeç dhe Gacalin Kopshti, 30 vjeç.
Gjithashtu ka plagosur edhe shtetasit A.P. 42 vjeç, N.M. 35 vjeç, V.K.22 vjeç dhe K.M. 26 vjeç, të cilët janë transportuar në spital për ndihmen e nevojshme mjekësore ku ndodhen jashtë rrezikut për jetën.
Ky shtetas njihet në zonë si përdorues i lëndëve narkotike dhe probleme emocionale të pakontrolluara. Janë ngritur pika kontrolli si dhe po bëhet krehja e zones në bashkëpunim me F.N.Sh-në me qëllim kapjen e tij dhe vendosjen para përgjegjësisë penale.
Grupi hetimor në vendngjarje vazhdon veprimet hetimore për zbardhjen e plotë të ngjarjes. Të gjitha sherbimet e komisariatit dhe drejtorisë vendore të policisë Shkodër janë në gadishmeri bashkë me forcat FNSH në ndjekje të autorit.
