Një 32-vjeçar mbeti i vdekur mbrëmjen e djeshme pasi u qëllua më dy plumba në kokë në rrugën “Shefqet Musaraj” në Tiranë.
Ka qenë një person, i cili është afruar pranë makinës së 32-vjeçarit Emiljano Boçit dhe ka qëlluar 4 herë në drejtim të tij.
Në momentin kur ka ndodhur ngjarja, viktima ka qenë nën shoqërinë e shokut të tij, 27-vjeçarit Melvin Disha, i cili mbeti i plagosur pasi mori një plumb në krahë si dhe të të dashurës, e cila u ka shpëtuar mrekullisht plumbave.
Ka qenë një telefonatë bërë nga qytetarët në Policinë e Tiranës, ku kanë njoftuar se në një makinë ndodhet një persona i plagosur.
Policia ka shkuar në vendin e ngjarjes, ku ka bërë të mundur dërgimin në spital të 32-vjeçarit, por ai nuk ka mundur që t’iu mbijetojë plagëve, pasi dy plumbat e marra në kokë kanë qenë fatale për të.
Ndërsa, pak më vonë në spitalin e Traumës ka mbërritur edhe shoku i tij, Melvin Disha, ku pas ndihmës së parë, mësohet se ai ndodhet jashtë rrezikut për jetën shkruan expres. Policia e Tiranës i ka përqendruar hetimet në dy pista të mundshme, atë të vrasjes për shkak të të shkuarës të Boçit, si dhe te ndonjë çështje hasmërie të familjes.
Burime bëjnë me dije se Boçi kishte më pak se dy vite që kishte dalë nga burgu, pasi ishte dënuar për dy akuza, atë të ‘vrasjes me paramendim e mbetur në tentativë’ si dhe të ‘armëmbajtje pa leje’.
Ngjarja në fjalë ka ndodhur saktësisht 8 vite më parë, më 14 Janar të vitit 2010, ku pas një konflikti banal, ai është konfrontuar me armë me disa persona të tjerë.
Pasi ka dalë nga burgu, Boçi ka jetuar më shumë jashtë Shqipërisë, ndërsa dyshohet se ai mund të jetë i përfshirë në fushën e trafikimit të lëndëve narkotike, kryesisht të heroinës.
Megjithatë, blutë e Tiranës janë në proces verifikimi, ndërsa do të jenë hetimet që do të përcaktojnë shkaqet e atentatit të 32-vjeçarit.
