Një biznesmen 64- vjeçar u ekzekutua me plumb në kokë mbrëmjen e djeshme, në zonën e ish-Bllokut në Tiranë. Viktima është Memli Begalla, nga Progonati i Tepelenës, baba i tre fëmijëve. Atentati ndodhi rreth orës 21:00, në rrugën “Nikolla Tupe”, në parkingun poshtë pallatit ku banonte viktima. Begalla është qëlluar me një armë me silenciator, në momentin që po hipte në makinën e tij.
Autorët e dyshuar të ngjarjes, sipas Policisë, janë larguar me një automjet tip “BMW” me ngjyrë të zezë dhe shërbimet janë vënë në ndjekje të saj. Zona ku ndodhi ngjarja është me ndriçim të dobët dhe askush nga kalimtarët apo banorët nuk ka mundur të dallojë atentatorët, ndërsa janë sekuestruar disa kamera sigurie për të bërë të mundur identifikimin e autorëve. Memli Begalla rezulton të jetë pronar i tri bizneseve në Tiranë, bashkë me njërin prej djemve dhe vajzën. Ai ka në pronësi dy gomisteri në zonën e Yzberishtit dhe në autostradën Tiranë-Durrës, si dhe një agjenci turistike, që administrohet nga vajza e tij. Policia ka nisur hetimet për zbardhjen e rrethanave të ngjarjes, përcaktimin e motivit dhe identifikimin e autorëve.
Sipas informacioneve mësohet se ai ka ndërruar emrin para disa kohësh, pasi më herët ka qenë me emrin Afrim. Po ashtu sipas burimeve të “Panorama”, Memli Begallës i kanë djegur një makinë Rang Rover.
/Panorama
