Detaje të reja kanë dalë në dritë për shpërthimin e ndodhur të martën në shtëpinë e babait të Leonard Dukës, në Tiranë. Ato i përcolli përmes një lidhjeje me edicionin e lajmeve në Tv Klan, gazetari Merin Maçi. Sipas tij, autoritetet hetimore po përpiqen që të bien në gjurmët e autorit duke analizuar kamerat e sigurisë që të çojnë tek pallati në zonën e Freskut. Ndërsa kamera që ndodhej në këtë pallat sipas gazetarit u hoq pak muaj më parë në operacionin “Fijet”, që kishte si qëllim heqjen e kamerave të dyshuara se ishin vendosur nga kontigjentë kriminal.
“E kaluara kriminale e dy djemve të Muhamet Dukës, duket se është në fokusin e hetimeve që po zhvillon policia e Tiranës. Nga ana tjetër agjentët e krimeve po analizojnë të gjitha pamjet filmiket që të lidhin dhe të çojnë në pallatin 7 katësh. Kjo pasi, për shkak të operacionit të koduar Fijet, kamerat e sigurisë të cilat ishin në këtë pallat vetëm disa muaj më parë, janë çinstaluar, çka ka sjellë vështirësi në verifikimet që po kryejnë uniformat blu. Sipas burimeve, një person është shquar në kamerat e sigurisë diku larg vendit ku u regjistrua ngjarja dhe po punohet me ndjekjen e itinerarit të këtij personi të dyshuar, ndonëse është ende larg rënies në gjurmët e autorit të vendosjes së eksplozivit në derën e banesës së babait të vëllezërve Duka, Muhamet Dukës”.
Vetë ky i fundit nuk jetonte prej vitesh në këtë shtëpi, ndërsa për apartamentin kujdesej një i afërm, i cili siç mëson gazetari, nuk ka dhënë informacione të vlefshme për autoritetet hetimore.
“65-vjeçari në fakt prej vitesh nuk jetonte në këtë banesë dhe sipas dëshmive që kanë dhënë edhe banorët në polici, janë shprehur se apartamenti ishte lënë për kujdesje një personi të afërm të familjes Duka. Megjithatë edhe ky person nuk ka dhënë detaje që mund t’i vlejë hetimit për të rënë në gjurmët e autorëve. Krahas përplasjeve të vjetra, ku janë përfshirë vëllezërit Duka për të cilat janë edhe nën akuzë nga SPAK, mes të cilave dhe vrasja e 2019-s të ish-efektivit Santiago Malko, policia po hetonte edhe pista të tjera të mundshme mund të kenë sjellë shpërthimin me tritol, sasi i të cilit është ende e pa përcaktuar nga grupi hetimor”.
Tritoli u vendos gjatë orëve të natës të së martës në katin e 4 të pallatit në zonën e Teleferikut. Nga ngjarja nuk pati të lënduar, por vetëm dëme materiale.
/s.f
