Transportimi nga Gjermania dhe futja e shumës së 3.4 mln eurove në mënyrë ilegale në Shqipëri, është një plan i mirëdetajuar që shtrihet në kohë. Megjithëse policia shqiptare ka arritur të zbulojë gjashtë personat që kanë qenë veglat e këtij skenari, pothuajse nuk dihet asnjë gjë se kush janë pronarët e vërtetë të kësaj shume.
Mësohet se kompania që importoi makinat është krijuar një muaj e gjysëm më parë, në datën 7 maj 2018 është regjistruar në Qendrën Kombëtare të Biznesit, kompania “Tirana Rental Car”, me pronarë Alfred Vladi dhe Flamur Vladi. Qëllimi i kësaj kompanie ishte të lëshonte automjete me qira, dhe për të zgjeruar punën dhe aktivitetin e tyre, Alfred Vladi, ka porositur blerjen e disa makinave “Toyota Auris” në Gjermani.
Në këtë skemë të mirëorganizuar, është impenjuar dhe një tregtar makinash, që quhet Alban Mollaymeri, i cili është kontraktuar nga Alfred Vladi për t’i blerë në Gjermani 7 makina “Toyota Auris”.
Në pranga:
• Agim Çeka, 61 vjeç, lindur në Luz i Madh, banues në Durrës;
• Edi Lika (Cani), 41 vjeç, lindur në Dibër, banues në Tiranë;
• Klevi Lika, 21 vjeç, lindur në Bulqizë, banues në Tiranë;
• Alban Mollaymeri, 40 vjeç, lindur dhe banues në Tiranë.
Janë shpallur në kërkim
• Alfred Vladi 33 vjeç, lindur në Peshkopi e banues në Tiranë;
• Elvis Vladi 38 vjeç, lindur në Peshkopi e banues në Tiranë.
a.ç
