Dështon atentati për hakmarrjen 19-vjeçare, katër të arrestuar në Tiranë

Një vrasje e ndodhur 19 vjet më parë vijon të shkaktojë plagë edhe në ditët e sotme. Historia e gjakmarrjes mes familjes Alidini dhe Isa në Kukës duket se është zhvendosur në Tiranë.

Policia e Tiranës ka arrestuar sot katër persona të cilët po planifikonin një vrasje për motive gjakmarrjeje. Sipas policisë të rinjtë u arrestuan pasi në bashkëpunim me njëri-tjetrin, janë kapur në flagrancë duke përgatitur një silenciator, për ta montuar në pistoletën tip “Zastav”, të cilën e mbanin pa leje.

Pavarësisht se nuk dihet ende kush ishte shënjestra e atentatit, mes të arrestuarve është edhe një pjesëtar i familjes Isai, çka ngre dyshime se gjithçka lidhet me gjakmarrjen mes dy familjeve në Kukës.

të arrestuar sot nga policia janë: Edmond Marku, 32 vjeç, banues në Durrës, i shpallur në kërkim nga Komisariati i Policisë Lezhë për Vjedhje, Blindim Isa, 25 vjeç, banues në Kukës, i dënuar më parë për Vrasje me dashje, Artur Shehu, 22 vjeç, banues në Tiranë, i dënuar më parë për Prodhim dhe mbajtje të lëndëve narkotike, Klodjan Koca, 34 vjeç, banues në Fushë-Kuqe.

Sipas polivcis, arma po e përgatitej për të kryer vrasjen e një shtetasi, për motive gjakmarrje, ndërsa jepen të dhëna mbi personin e shënjestruar për arsye hetimi dhe sigurie.

Arma është gjetur në banesën e shtetasit Edmond Marku, e cila u sekuestrua në cilësinë e provës materiale.

HISTORIA E GJAKMARRJES
19 vjet më parë, Memish Alidini u vra nga babai i Miraim Isait. Vrasja e vitit 1997 u bë shkak që djali i viktimës të hakmerrej duke vrarë Miraimin.

Ngjarja ndodhi në një dasmë në fshatin Orgjost në Kukës në korrik të vitit 2016. Ismail Alidini, 24 vjeç u arrestua disa orë pasi qëlloi pas shpine, me thikë, bashkëfshatarin e tij, 29-vjeçarin Miraim Isa.

Sipas policisë, krimi ndodhi rreth orës 22:30, ku 24-vjeçari e ka goditur në befasi nga pas disa herë me thikë Miraim Isain. Edhe pse ishte errësirë të pranishmit e tjerë e njohën, pasi bëhej fjalë për një bashkëfshatarin e tyre.

Në vitin 1997, babai i 29-vjeçarit Miraim Isa, Behram Isa, pas një grindjeje vrau me armë zjarri në oborrin e shtëpisë babain e Ismail Alidinit, Memishin.

Në atë kohë, djali i mbetur jetim ishte 5 vjeç, i cili rritej bashkë me rrëfimin e familjarëve të tij se si iu vra babai në oborrin e shtëpisë. Në të vërtetë, vrasësi u kap nga policia dhe u dënua me 13 vjet heqje liria. Ai para disa vitesh doli nga burgu dhe më pas vdiq në shtëpi, por duket se kjo nuk e ka zgjidhur situatën e rënduar mes dy familjeve.
shqiptarja.com/d.i.