Tortura makabre, vrasje çnjerëzore, të të marrin shpirtin pa të dalë mirë fryma e fundit. Këto vuajtën disa klerikë katolikë nga regjimi komunist, vetëm e vetëm sepse ata nuk hoqën dorë nga bindjet e tyre fetare.
Të gjithë klerikët katolikë shqiptarë gjatë diktaturës komuniste kanë kryer sëbashku 881 vjet burg ose afro 9 shekuj. Që të gjithë ata kishin kryer sëbashku 450 vjet studime në 24 universitete të Evropës.
Pas 22 vitesh punë kërkimore shkencore, Vatikani përzgjodhi mes tyre 38 klerikë duke i shpallur martirë, prej të cilëve vjen një fakt edhe më rrënqethës: 28 prej 38 martirëve nuk kanë fare varr.
Shifra u bënë publike dje gjatë emisonit “Debati në Channel One” të gazetarit Roland Qafoku, një puntatë që u shndërrua në homazh për klerikët martirë në nder të të cilëve nesër në Shkodër do të mbahet ceremonia e lumnimit të tyre.
Drejtori i Institutit të Teologjisë dhe Filozfisë në Shkodër At Mario Imperatori, një organizatorët e kësaj ceremonie Dom Mark Shtjefni si dhe studiuesit Parçel Hila dhe Dorian Koçi sollën në vëmendje të publikut fakte, të dhëna dhe dëshmi unikale që nuk ishin dëgjuar më parë lidhur me persekutimin e klerit katolik shqiptar. Mes 38 klerikëve të shpallur martirëve, një ishte gjerman, një polak dhe një italian.
Mbi 881 vite burg (afro 9 shekuj) kryen priftërinjtë që kishin kryer studime në 24 universitete të Evropës.
28 prej 38 martirëve të fesë katolike nuk kanë fare varr.
Dëshmitë më rrënqethëse të denja për në Mesjetë: Pasi ia prenë këmbët me sopatë, Dom Lazer Shantoja u pushkatua, Papa Josif Papamihali u mbyt në baltën e kënetës së Maliqit, Ata Serafin Koda vdiq pasi hetuesi e mbyti me thonj në fyt, Maria Tuci u mbyll në thes me një mace dhe e qëllonin me shkop.
Disa nga krimet më të rënda:
-Dom Lazer Shantoja, pasi hetuesi i preu këmbët me sëpatë, e pushkatuan dhe e hodhën në një gropë pa emër.
-At Serafin Koda, vdiq pasi hetuesi i futi thonjtë në fyt në kuptimin e vërtetë të fjalës.
-Maria Tuci, pasi refuzoi të bëhej e dashura e kryetarit të degës së Brendshme të Shkodrës, u torturua duke e futur në një thes të mbyllur bashkë me një mace dhe e qëllonin me shkop.
-Papa Josif Papamihali, u torturua dhe u mbyt në baltën e kënetës së Maliqit.
-Imzot Jul Bonati, u mbyll pa qenë i sëmurë në çmendinë e Durrësit dhe vdiq teksa mjekët bën me të eksperimente si një kavie.
-Dom Aleksandër Sirdani, pasi u tërhoq zvarrë i lidhur aps një kali, u mbyt në një gropëfekalesh.
-E megjithatë ata shprehën besnikëri ndaj Jezu Krishtit në të cilin besonin si At Gjon Shllaku që përpara se ta pushkatonin tha: Rroftë Krishti mbret. I falim armiqtë tanë!
/a.m.
