Spiro Ksera është ulur në lokalin ku pinte zakonisht kafenë në Derviçan, para se një “eskortë” policore të mbërrinte në fshatin e tij për ta marrë. Dëshmitarët në lokalin ku gjendej Ksera thonë se ai të linte përshtypjen se ishte informuar më parë për urdhrin e arrestit ndaj tij, ndaj sipas tyre mesa duket ai ka vendosur ta presë policinë pikërisht aty për të shmangur prangosjen në sy të fëmijëve dhe gruas, shkruan Panorama.
“Ishte ora rreth 20:30 kur erdhi policia. Ksera ishte i ulur më herët në lokal me nënkryetarin e Bashkisë së Dropullit. Ky i fundit qëndroi bashkë me të, deri pak minuta para se të befte policia. Nuk vumë re ndonjë shqetësim të veçantë të tij, pasi askujt nuk ia priste mendja që do të ndodhte kjo. Tani që u bëjmë lidhjen veprimeve para ngjarjes, duket sikur ishministri ka qenë në dijeni se do të arrestohej.
Pra, vetëm pak minuta para se të vinte policia, është ngritur dhe ka ikur nënkryetari i Bashkisë, por Ksera nuk lëvizi nga vendi. Priti për pak derisa i ra telefoni dhe pasi foli vetëm pak sekonda, u ngrit që të dilte. Në këtë moment, u duk qartë një shqetësim i tij. Kur doli te dera, e pamë që po fliste me dy oficerë të Policisë. Ata i nxorën një letër, që me sa duket ka qenë fletëarresti dhe më pas Ksera iku bashkë me ta, pa bërë asnjë rezistencë”, u shpreh banori me inicialet A.B.
“Gjithçka do të sqarohet, ju bëni detyrën”, mësohet të kenë qenë fjalët e vetme të tij ndaj efektivëve që e kanë marrë atë. Banorë të tjerë pohojnë se në fshat kanë ardhur tri makina policie, mes të cilëve një furgon dhe dy mjete të vogla. Sipas tyre, në mjete ishin rreth 10 efektivë. Në fshatin Derviçan, përgjatë ditës së djeshme, kryefjala ka qenë arrestimi. Banorët thonë se kjo ka prapavijë politike dhe etnike. Burime të Policisë bënë të ditur se Ksera është mbajtur për gati 4 orë e gjysmë në dhomën e shoqërimit në Gjirokastër deri sa mbërriti patrulla e “Shqiponjave” nga kryeqyteti, të cilët e kanë marrë. Ksera edhe kur ka qenë ministër, ka jetuar në Derviçan me gruan e fëmijët.
