Ekspertët e Komisariatit Numër 1 të policisë janë rikthyer në vendin ku u krye grabitja me dhunë e një shume të konsiderueshme parash. Ata kanë bërë matjet dhe kanë sekuestruar pamjet e kamerave të sigurisë të “Hotel Sheraton” dhe të gjithë bizneseve rreth e rrotull vendit të ngjarjes.
Sipas policisë, nga hetimet paraprake dhe kqyrjes së kamerave, ka rezultuar se Sajmir Hasanit, 38 – vjeç, me detyrë arkëtar i një firme këmbimi valutor dhe shtetasit me inicialet, B. Xh., 55 – vjeç, me detyrën e shoqëruesit të vlerave monetare të kësaj pike këmbimi valutor, të dy me banim në Tiranë, në momentin që kanë dalë nga një bankë e nivelit të dytë, u janë afruar dy persona pa maska dhe pa armë.
Njëri prej tyre i ka marrë çantën me shumën monetare Sajmir Hasanit, ndërsa bashkëpuntori ka goditur me shkelm shoqëruesin. Më pas, ata janë larguar me vrap në drejtim të një motori, që e kishin parkuar në afërsi të sheshit “Nënë Tereza”.
Por një dëshmitar okular në vendin e ngjarjes sqaron se, ata ishin të maskuar me shami të zezë dhe se janë larguar me një motor, me një tabelë ‘shitet’, në drejtim të rrugës mbrapa Liqenit Artificial. Dëshmitari rrëfen se motorin e përdorur nga grabitësit e kishte parë të parkuar në rrugën para hotelit edhe një ditë para ngjarjes.
Kjo dëshmi përforcon dyshimet e policisë se, autorët ishin në dijeni të faktit që dy punonjësit e agjencisë së këmbimit valutor do të tërhiqnin para nga banka dhe e kanë planifikuar në detaje grabitjen.
Policia ka dyshime të forta se, ata janë ndihmuar nga stafi i agjencisë së këmbimit valuator, të cilët mund t’u kenë dhënë informacion për të gjitha lëvizjet. Për këtë arsye janë marrë në pyetje i gjithë stafi dhe familjarët e pronarit të agjencisë së këmbimit valutor.
Tv Klan
