40 vjeçari shqiptar që vrau bashkëshorten në Volos të Greqisë ka ndryshuar dëshminë e tij për ngjarjen e rëndë, ndodhur më 22 gusht.
Fillimisht, në deklaratën e dhënë pas ngjarjes, ai e justifikoi veprimin e tij me dyshimet për tradhti, duke thënë se gruaja e “meritonte të vdiste”. Së fundmi, në një intervistë televizive për kanalin grek Mega, 40-vjeçari ka dhënë një version tjetër.
Ai pretendon se nuk kishte ndërmend ta vriste, por vetëm të trembte bashkëshorten. Sipas tij, situata eskaloi kur mësoi për një tradhti nga vetë viktima.
Ai gjithashtu përmend një “person të tretë” që sipas tij u shkatërroi familjen.
“E doja shumë gruan time dhe kurrë nuk planifikoja ta dëmtoja apo ta vrisja. Doja vetëm ta trembja. Ajo më tha se fëmija që kishte humbur nuk ishte i imi dhe se do të më dërgonte foto dhe video me partnerin e saj të ri. Dyshimet e mia u konfirmuan.
Një person i tretë na shkatërroi familjen. Ndjej keqardhje të madhe, mendoj për fëmijët e mi dhe do të doja ta ktheja kohën pas. Kam punuar shumë për familjen time dhe kisha besim të plotë te ajo. I dua shumë fëmijët e mi dhe u kërkoj falje”, u shpreh 40 vjeçari.
