Deputeti socialist Alket Hyseni i ftuar në një studio televizive foli për punimet e komisionit të Reformës Zgjedhore. Hyseni, anëtar i këtij komisioni, tha se çdo qytetar i Shqipërisë është i interesuar për këtë proces. Gjatë intervistës ai u pyet ndër të tjera edhe mbi pikat e takimit dhe të ndarjes së PS-PD përsa i përket Reformës Zgjedhore.
Fillimisht, Hyseni u ndal te të përbashkëtat.
“Unë besoj, me aq sa kemi informacionet tona, që brenda radhëve të tyre ka zëra profesionalë , të cilët jam i bindur që do të konvergojnë në të njëjtin qëndrim me ne, që standardet do të realizohen”, u shpreh ai duke u ndalur te standardet e lartpërmendura.
“Barazia gjinore. Pavarësisht se Shqipëria ka bërë hapa të mëdha ka patur rekomandime për t’i avancuar këto hapa dhe në këtë aspekt, edhe opozitat e të gjitha llojeve, brenda dhe jashtë Parlamentit janë dakord. Financimi i partive politike, kemi rënë dakord që kërkon një adresim të ri. Po kështu çështje që kanë të bëjnë me mënyrën e ndërtimit të komisioneve”, shtoi Hyseni.
I pyetur mbi pikat ku dy partitë ndahen nga pikëpamja e filozofisë për Reformën Zgjedhore, deputeti tha:
“Nuk mund të themi se ku ndahemi me ta përveç aspekteve proceduriale sot, për të cilat as me kompetencë që ndahemi sepse ata kërkojnë që të anashkalojnë kushtetutën, ligjet, institucionet. Në pjesën tjetër janë vetëm me të dëgjuar, nuk kemi institucionalisht asnjë qëndrim”, tha ai.
Sipas deputetit, prioritet mbeten rekomandimet e OSBE/ODIHR-it.
“Edhe sot diskutimi ka qenë mbi një draft që është produkt i ekspertizës së OSBE/ODIHR. Ne e kemi shtrirë dorën ndaj opozitës jashtëparlamentare që të marrë pjesë në këtë komision, opozita ka zgjedhur që të shqyrtojë draftin, të ndërtojë draftet e veta e t’i nisi ato me interlekutorë të tjerë. E rëndësishme për ne është që të marrin pjesë të gjithë ata që kanë dëshirë të marrin pjesë. Jam i bindur që opozita do ta gjejë kurajën politike për t’u bërë pjesë e këtij procesi”, tha ai.
