Deputetet e Partisë Demokratike, Mimoza Hajdarmataj dhe Irma Kopliku zhvilluan një takim me nënat dhe vajzat e Tropojës në atmosferën e ditëve të 7-8 Marsit, ku u ngrit shqetësimi i varfërisë e papunësisë, si penalizim i vazhdueshëm për gratë në këtë zonë.
Deputetja Hajdarmataj tha se sot nënat dhe vajzat ndiejnë pasojat më të rënda të krizës ekonomike, papunësisë dhe mungesës së mundësive për një jetë normale.
“Ne jemi një zonë me resurse të mëdha natyrore, me gra dhe vajza të afta, por që nuk marrin asnjë mbështetje për të shfaqur vlerat e tyre. Sot biznesi është në krizë dhe nuk gjeneron vende pune, ndërsa vetë shteti nuk jep asnjë mbështetje për gratë në nevojë. Në Tropojë dhe në të gjithë veriun nuk hapet një punishte fason apo agrobiznesi që të punësojë gra e vajza, por gjithçka mbetet manipulim qeveritar”, tha deputetja Hajdarmataj.
Ajo premtoi se gratë e opozitës në parlament do të jenë zëri i çdo gruaje dhe nëne shqiptare në vështirësi dhe në nevojë. Beteja jonë, tha ajo, do të vazhdojë deri në ndryshimin e madh për të sjellë shpresën dhe buzëqeshjen e mohuar të nënave që përpiqen me vetëmohim për familjet e tyre.
Deputetja e Shkodrës, Irma Kopliku u shpreh se momenti më i vështirë i kësaj krize që po jetojnë më së shumti gratë dhe nënat, është emigrimi i fëmijëve dhe i të rinjve. Prandaj ne gratë, tha ajo, duhet të mbështesim njëra tjetrën për të përcjellë shpresën tek familjet tona dhe se gjendja do të ndryshojë dhe programi i PD-së do të sjellë ringritjen e vendit.
Gjatë takimit, shumë vajza e gra ngritën problemin e papunësisë dhe të mungesës së mbështetjes sociale për gratë në nevojë.
