Policia e Tiranës komunikoi ditën e sotme arrestimin e një djali 22-vjeçar, pas denoncimit të bërë ndaj tij për përdhunim, nga ana e një vajze të mitur.
Ngjarja pretendohet se ka ndodhur në Kamëz, ku nën akuzë i vënë në pranga është Ardit Domi, nga fshati Resk i Kukësit.
Ishte e mitura ajo që iu tregoi prindërve se ishte përdhunuar, duke çuar në denoncimin në polici.
Por gjatë marrjes në pyetje, vajza rreth 16 vjeçe, në prani të psikologes ka thënë se me Arditin është njohur nëpërmjet rrjetit social Facebook dhe se pas afro një muaji komunikim, e kishin lënë për takim.
Vajza pretendon se i riu kuksian i ka shkuar me makinë në shkollë ku dhe e ka marrë mesditën e djeshme.
“Por pasi ndaloi makinën diku në periferi më kërkoi që të hiqja rrobat. Unë kundërshtova por ai më tha se donte të shikonte nëse isha e virgjër apo jo”, mësohet që të jetë shprehur e mitura.
Po ashtu ajo ka treguar se i riu i ka kërkuar vazhdimisht fotografi ku të shfaqej e zhveshur.
Ndërkohë vetë 22-vjeçari ka mohuar kategorikisht abuzimin seksal, duke thënë se çdo gjë është bërë me dëshirë.
Domi pretendon se vajza ka bërë denoncim, për shkak të frikës nga ana e prindërve, pasi ishte vonuar në kthim nga shkolla.
Mirëpo policia ka gjetur në telefonin e të riut fotografi të vajzës zhveshur, të cilat duket se përkojnë me ditën kur pretendohet se ka ndodhur përdhunimi, të martën e 28 janarit.
/a.r
