Pas një denoncimi në “Fiks Fare”, policia e Korçës ka nisur procedim penal ndaj tre mjekëve të spitalit rajonal. Ndaj tyre rëndon akuza e shpërdorimit të detyrës dhe korrupsionit pasiv të personave që ushtrojnë funksione publike.
Të proceduar janë K. SH, 43 vjeç shef i urgjencës, R. Ç, 45 vjeç mjek kirurg dhe V. Ç, 68 vjeç gjithashtu mjek kirurg në spitalin e Korçës.
Një qytetare kishte denoncuar rastin në emisionin investigativ “Fiks Fare”, pasi mjekët i kanë marrë për një operacion të thjeshtë shumën prej 20 mijë lekësh të reja.
Komunikata e policisë:
“Nga Specialistët e Seksionit për Krimin Ekonomiko–Financiar, filloi procedimi penal në gjendje të lirë, ndaj shtetasve:
- K.SH, 43 vjeç, banues në Korçë, (me detyrë, Shefi i urgjencës së Spitalit Korçë).
- R. Ç, 45 vjeç, banues në Korçë, (me detyrë, mjek kirurg pranë Spitalit Korçë).
- V.B, 68 vjeç, banues në Korçë, ( me detyrë ,mjek kirurg pranë Spitalit Korçë).
Procedimi penal ndaj tyre , filloi pas, denoncimit të bërë nga një qytetar, në emision televiziv, investigativ “Fiks Fare” transmetuar më datë 02.12.2015.
Në të cilin, u paraqitën pamje filmike, ku këta shtetas, me detyrë mjekë pranë Spitalit Rajonal Korçë, për një operacion kirurgjikal, i kanë marrë, shumën prej 20 000 lekësh (të reja), një shtetasi.
Procedimi ndaj tyre, u krye për konsumim të elementë e të veprave penale: “Shpërdorimi i detyrës” dhe “Korrupsion pasiv i personave që ushtrojnë funksione publike” parashikuar nga nenet 248 e 259 të Kodit Penal.
Policia e Shtetit, fton mediat të denoncojnë, çdo rast korruptiv apo aferë duke garantuar se do t’i ndjekë, në kohë dhe me seriozitet , denoncimet duke vënë përpara përgjegjësisë çdo shkelës ligji.”- thuhet në njoftimin e policisë.
